18-майдиз Дагъларин уьлкведин медениятдин тарихда лишанлу вакъиа кьиле фена: Сулейман-Стальский райондин Агъа СтIалрин хуьре, СтIал Сулейманан шииратдин йикъарин сергьятра аваз, XX асирдин Гомеран цIийиз эхцигнавай музей ачухна.

Шадвилин мярекатар Сулейман-Стальский райондин руководстводи чIехи шаирдиз Кьасумхуьруьн центрада хкажнавай гуьмбетдал цуьквер эцигунилай гатIунна. Гуьгъуьнлай мярекатдин иштиракчияр ЦIийи Мамрачрин къекъуьндал СтIал Сулейманаз эцигнавай мемориалдал фена. Анални цуьквер эцигайдалай кьулухъ вири Агъа СтIалдал рекье гьат хъувуна.

Сятдин 12-даз ина шаирдин цIийиз арадал хканвай музей ачухунихъ галаз алакъа­лу шадвилин митинг кьиле фена. Шииратдин суварик хтанвай мугьманрин арада РД-дин Кьил Рамазан Абдулатипован уьмуьрдин юлдаш Инна Калинина, РФ-дин Федерациядин Советда Дагъустандин патай векил-сенатор Сулейман Керимован уьмуьрдин юлдаш, мергьяматлувилин “Территория Добра” (“Хъсанвал авунин майдан”) фондунин регьбер Фируза Керимова, Кьиблепатан Дагъустанда РД-дин Кьилин патай тамам ихтиярар ганвай Векил Энрик Муслимов, РД-дин Халкьдин Собранидин депутат Гьамидуллагь Мегьамедов, Да­гъус­тандин культурадин, печатдин ва инф­ор­ма­циядин, милли политикадин рекьяй­ ми­нистрар — Зарема Бутаева, Рашид Акавов, Татьяна Гамалей, РД-дин культурадин ирси­нин объектар хуьнин рекьяй Агентстводин регьбер Заур Къагьриманов, Дагъустандин писателрин Союздин председатель Мегьамед Агьмедов, Ахцегь, Мегьарамдхуьруьн, Кьурагь районрин кьилер, “Лезги газетдин”, Лезгийрин СтIал Сулейманан тIварунихъ галай госмуздрамтеатрдин, общественный ва яратмишдай интеллигенциядин векилар, милли эдебиятдал рикI алай хейлин маса ксар авай.

Митинг Сулейман-Стальский райондин кьил Нариман Шамсудиновича ачухна. Ада музей арадал хкуник лайихлу пай кутур мергьяматлувилин “Территория Добра” фондуниз, “Завод минеральных вод “Рычал-су” ОАО-диз, “Коломяги-Ретор” ЗАО-дин гендиректор, “Санкт-Петербургские лезгины» отделенидин председатель Зураб Шайдаеваз, аслу тушир “Гражданское общество” ассоциациядин президиумдин сопредседатель Рашид Сардароваз, музей эхцигунин кIвалахар хсуси гуьзчивилик кутур Дагъустандин руководстводиз сагърай лагьана.

РД-дин культурадин министр Зарема Бутаевади вичин рахунра СтIал Сулейманахъ яратмишунрин зурба ирс авайди, чун адав къадирлувилелди эгечIна кIанза­вай­ди ва вичин тIварцIелди вири Дагъустандин халкьдиз баркаллувал багъишай чIехи шаирдин музей са куьруь вахтунда арадал­ хкун милли лайихлувал тирди къейдна.

Вучиз ятIани “Сулейман-Стальский район” ибарадин чкадал “Кьасумхуьруьн район” ишлемишай (дуьшуьшдай яни, я тахьайтIа кьасухдай Сад Аллагьдиз чи­да) З.Бутаевади СтIал Сулейман “лезги шииратдин бине эцигайди я” лагьана. СтIал Сулейман Дагъустандин Советрин девирдин литературадин бине кутурбурукай сад тирди къейднайтIа, дуьз жедай. Ри­кIел хкин: лезги шииратдин эвел гьеле Дав­дакьалай (VII асир) гатIунзава ва XX асирдин Гомерал къведалди цIудралди шаирри лезги чIалал шиирар туькIуьрна.

Республикадин Кьил Рамазан Абдулатипован патай тебрикдин гафар гваз Эн­рик Муслимов рахана.

Дагъустандин халкьдин шаир Мегьамед Агьмедова, СтIал Сулеймана Дагъларин уьлкведин шииратдин алемда кьазвай чка къалуруналди, чIехи шаирдин яратмишунриз еке къимет гана.

Митингдин сергьятра аваз, Фируза Керимовадив, “Территория Добра” фондунин векил, РД-дин Общественный палатадин член Шуми Шабатаевав, Россиядин лайихлу художник Шариф Шагьмардановав — “За любовь к родной земле” гьуьрметдин знакар, СтIал Сулейманан музейдин директор Лидия Стальскаядив, “Территория Добра” фондунин крар идара ийизвай директор Владимир Масловав, Рашид Сардаровав, Зураб Шайдаевав, “Завод минеральных вод “Рычал-су” ОАО-дин векилрив  Дагъустан Республикадин гьуьр­метдин грамотаяр вахкана. Са жерге мугьманриз шабагьар Сулейман-Стальский райондин администрациядини гана.

Мярекатдал мад Салигьат Гьамзатова, СтIал Сулейманан птул Ризван Мамедов, Ахцегь райондин кьил Осман Абдулкеримов (ада ахцегьвийрин патай музейдиз шаирдин еке суьрет багъишна) ва масабур рахана.

ЦIийиз эхцигнавай музей ачухунин лент атIун Нариман Абдулмуталибовал, Зарема Бутаевадал, Фируза Керимовадал ва Инна Калининадал ихтибарна. Ахпа Лидия Стальскаяди мугьманриз музейда итижлу сиягьат тешкилна.

Къейд ийин хьи, СтIал Сулейманан шииратдин йикъарин сергьятра аваз, музейдин гьаятда шаирдиз эцигнавай цIийи памятникни ачухна.

Эхирдай Лезгийрин СтIал Сулейманан тIварунихъ галай госмуздрамтеатрдин артистри, Дагъустандин кьуьлердайбурун “Каспий” госансамблди, Кьасумхуьруьн Культурадин кIвалин гьевескарри, Сулейман-Стальский райондин музыкадин мектебра чирвилер къачузвай аялри яргъалди давам хьайи концерт гана.

Мегьамед  Ибрагьимов