Россиядин сергьятдин «Ярагъ-Къазмаяр» отделенидин дараматдин цлал мукьвара, вичин къуллугъдин везифаяр тамамардайла, игитвилелди телеф хьайи прапорщик Османов Мадрид Энверовичан тIвар эбеди авунин лишан яз, мемориалдин кьул ачухна.
М. Османов 2000-йисан 14-ноябрдиз Кьулан СтIалрин хуьре дидедиз хьана. 2025-йисан 13-январдиз РФ-дин Государстводин сергьятар хуьдайла ам телеф хьана.
РФ-дин Президентдин Указдалди М. Османоваз «Жуьрэтлувиляй» орден гана.
Мемориалдин кьул ачухунин мярекатда РФ-дин ФСБ-дин РД-да авай Дербентдин сергьятдин къуллугъдин управленидин начальник, генерал-майор Владимир Жуковскийди, СтIал Сулейманан райондин Кьил Саид Темирханова, Кьулан СтIалрин СОШ-дин муаллимри, юнармейцийри ва рагьметлудан багърийри иштиракна.
Хазран Кьасумов
