И йикъара Кьиблепатан Дагъустандин бязи чкайра акъатай къати гару агьалийриз зиянарни тагана тунач. Сулейман-Стальский райондин Герейханован 1-хуьруьн А.Пушкинан тIварунихъ галай куьчедин агъа кьиле А.Мегьтиевадин сала акIурнавай чIехи къавахар лагьайтIа, экверин симера гьатнавай, чебни кIаняй ктIанвай.
И гьалдин патахъай кIвалин иесидизни, хуьруьн администрациядин кьил Р.Алдировазни са шумудра къуншийри арза авунвай, амма, гьайиф хьи, са серенжемни кьабулнач, эхирни гьавиляй хъсанди хьанач. Къати гару тарара аруш хьанвай симин тар кIаняй акъудна, адан къвалав гвай 40 метр кьван кьакьанвал алай къавахдин тар рекьин а пата авай къунши М.Гьашимован кIвалер галайвал аватна. Гена бахтуни гъана, гьамиша гьаятда къугъвазвай М.Гьашимован аялар, тар ярх хьайила, кIвале авачиз хьана. И дуьшуьш арадал атай чIавуз ремонтдин кIвалахар авун патал линияда электроэнергия хкуднаваз хьана, тахьайтIа кIвалери цIай кьунни, чIуру маса нетижаяр арадал атунни мумкин тир.
И дуьшуьшдилай гуьгъуьниз чIуру кардин вилик пад кьун патал къуншийрин куьмекдалди къвалав гвай чIехи тарар атIана. Герейханован хуьрерин салара куьгьне хьанвай къавахрин тарарни, экверин линияр физвай чкаяр мадни ава. Ихьтин кIвалахрин вилик пад кьун патал хуьруьн администрациядин кьил вилик хьун герек я, амма, гьайиф хьи, ихьтин кIвалахриз виликамаз фикир гузвач.
Вадим Жамалдинов
