Меслятдал атуникай фикирзавач
Евросоюзди Украинадиз гузвай кредит гуя Россиядин активрин гьисабдай вахкун герек яз гьисабзавай Владимир Зеленскийдин гафарай чир жезва хьи, Киевдиз ислягьвал арадал хкун патал рахунар кьиле тухудай ашкъи авач. Ихьтин фикир США-дин ВС-дин отставкада авай подполковник Д.Дэвиса соцсетра кхьенва, хабар гузва «РИА Новости» чешмеди.
«Гъалибвал къачуз тежедай женгерихъ галкIун давамаруналди, абуру дипломатия инкарзава», — кхьенва ада. Къейдзавайвал, меслятдал атунин рахунар авун патал Европадин уьлквейрин ва Киевдин патай гьич са ван-сесни авач.
Венесуэладал гьужумиз кIанзава
США-ди махсус серенжем кьиле тухун патал самолетар, кьушунар ва маса яракьар Карибский бассейндин мулкара тайинарда. Америкадин СМИ-рин малуматрал асаслу яз, идакай «РИА Новости» чешмеди хабар гузва.
«США-ди и гьафтеда гзаф кьадарда махсус самолетар ва кьушунарни яракьар авай самолетар Карибский бассейндин райондиз акъудна. И карди Вашингтондиз тIвар кьунвай регионда мумкин тир женгинин гьерекатар кьиле тухун патал алава мумкинвилер гуда», — кхьизва сифтегьан чешмеди.
Алатай гьафтеда малум хьайивал, америкавияр Венесуэладин бязи объектриз дуьм-дуьз ягъунар кьуниз гьазур жезва. Ягъунар кьунин гьерекатар, макъалада къейдзавайвал, кибермайданра серенжем кьиле тухунилай башламишун мумкин я: и карди гуя Каракас ПВО-дин къурулуш ишлемишуникай магьрум жеда лугьузва.
Гуя наркотикар тухузвайбур я лугьуз, Карибский гьуьле США-дин яракьлу къуватри эхиримжи са шумуд вацра катерар тергна. Вашингтонди тестикьарзавайвал, ихьтин серенжемар тахсиркарвилерихъ галаз женг тухунин, наркотикрихъ галаз алакъалу савдайрин вилик пад кьунин макьсаддалди кьилиз акъудзава. Ихьтин гьалар себеб яз Венесуэладинни США-дин алакъаяр къайи хьанва. Лацу кIвали ЦРУ-диз (центральное разведывательное управление) Николас Мадуродин гьукумат пайгарвилик кутун патал Венесуэлада сирлу серенжемар кьиле тухудай ихтияр ганва. США-дин генпрокурор Пэм Бондиди лагьайтIа, Мадуро дустагъ авуниз куьмек жедай гьакъикъи информация гайидаз 50 миллион доллардин пишкеш гун хиве кьунва. Тестикьарзавайвал, гуя Венесуэладин регьберди США-диз наркотикар ракъурун патал террориствилин тешкилатар ишлемишзава.
Идалай вилик Дональд Трампа малумарнай хьи, наркотикралди алверзавайбурал неинки гьуьле, гьакI кьураматдани гьужум авун патал уьлкведин кьушунар гьазур я.
Хиве кьуна
Эхирни ВСУ-дин Генштабди Северскдай кьушунар ахкъудайди хиве кьуна. Идакай «Лента.ру» чешмеди хабар гузва. Украинадин яракьлу кьушунар Северск шегьердай эхкъечIунин себеб, ВСУ-дин Генштабди гьисабзавайвал, аскеррин уьмуьрар ва подразделенийрин хатасузвал хуьнин мураддалди кьабулай къарардихъ галаз алакъалу я.
Украинадивай шегьер къакъатайдакай гьеле 11-декабрдиз малум хьанвай. Идан гьакъиндай Россиядин ВС-дин Генштабдин начальник Валерий Герасимова Президент Владимир Путиназ доклад авунай. Северск гуьзчивилик кутун себеб яз, Россиядин Яракьлу Къуватриз Славянск ва Краматорск патал женгер гатIундай мумкинвал хьана. Малум тирвал, ихтилат физвай регионда ВСУ-дин гуьзчивилик гьа и кьве шегьер кума.
Къанунар чIурзава лугьуз
Госдумадин депутат С. Боярскийдин фикирдалди, Россияда WhatsApp (адан сагьиб тир «Мetа» компания Россияда экстремиствилинди яз гьисабнава ва къадагъа авунва) мессенджердин кIвалах тамамдиз акъвазарун мумкин я. «Мессенджерди Россияда бегьемдиз кIвалах хъувуник умуд кутаз жедач. Эгер гьалар дегиш тахьайтIа, сервисди чи уьлкведа дуьзгуьндаказ кIвалах хъийидач», — раижзава «РИА Новости» чешмеди депутатдин гафар.
Идалай вилик Роскомнадзорди хабар ганай хьи, тIвар кьунвай мессенджерди Россиядин къанунар чIурун давамарзава. Къанунар чIурунин гьерекатар давам хьайитIа, сергьятвилер мадни артухардайвал я.
Августдиз Роскомнадзорди WhatsApp ва Telegram мессенджеррин зенгер къадагъадик кутаз башламишнай.
«Лезги газет»
