Махсус серенжемдикай
Россиядин аскерри Харьковдин областда ВСУ-дин 3 лагьай бригададин десте тергна. Идакай 16-декабрдиз «РИА Новости» чешмеди хабар гана.
«Дяведин женгер физвай «Меловое — Хатнее» участокда мидяди 3 лагьай бригададин дестеяр вилик ракъурун патал кьве сеферда алахъунар авуна. Гуьлле гунин нетижада мидядин алахъунар гьакIанбуруз элкъвена, дестейрикай сад терг хьана», — кхьизва чешмеди.
Къейдзавайвал, Первомайскдин мулкара Россиядин кьушунри «Град» РСЗО тергна. Икьван чIавалди адай душманри Белгород язавай. РФ-дин оборонадин министерстводин делилралди, винидихъ тIвар кьунвай участокда ВСУ-дикай 490 боевик хкатна, 25 автомобиль, РЭБ-дин 3 станция, дяведин суьрсет хуьзвай 3 склад ва артиллериядин 2 яракь терг хьана.
ДНР-дин кьил Денис Пушилина «Россия 24» телеканалдай малумарайвал, Россиядин кьушунри Константиновка гуьзчивилик кутунин женгер агалкьунралди давамарзава.
Къейд ийин, Константиновка ДНР-дин кеферпата авай шегьер я, ам Донецкдивай 55 километрдин яргъа мензилда ава. Алатай гьафтеда Яракьлу Къуватрин Генштабдин кьил Валерий Герасимова РФ-дин Президент Владимир Путиназ къейд авурвал, Константиновкадин дараматрин 45 процент чи аскерри гуьзчивилик кутунва.
15-декабрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 669 самолет ва 283 вертолет, зенитный ракетайрин 639 комплекс, пилот галачиз лув гудай 103182 аппарат, 26546 танк ва дяведин маса машинар, РСЗО-дин 1631 машин, артиллериядин ва маса 31915 яракь, военный махсус 49046 автомашин тергна.
Асул къурху
Дуьньядиз асул къурхулувал Брюсселда гьукум гужуналди кьунвай Европадин элитади къалурзава. Ихьтин фикир РФ-дин къецепатан крарин министр Сергей Лаврова малумарна.
Икьрардал атана
Германиядин канцлер Ф. Мерца тестикьарайвал, Евросоюздин уьлквеярни США Украинадиз НАТО-дин вад лагьай статьяда къалурнавай жуьредин хатасузвилин заминвилер гунин патахъай икьрардал атанва. Идакай «РИА Новости» чешмеди хабар гузва.
«Им идалай вилик тахьай хьтин метлеблу меслят я: европавиярни, америкавиярни Киевдиз хатасузвилин заминвал гуз гьазур я», — лагьана Мерца.
Идалай вилик В. Зеленскийди альянсдик экечIуник кьил кутадач лагьанай, эгер кьилдин уьлквейри, гьа жергедай яз США-дини хатасузвилин заминвилер гайитIа.
Мерца алава хъувурвал, Америкади тайин мажбурнамаяр вичин хивез къачунва. Алатай гьяддиз Берлинда США-динни Украинадин векилрин арада рахунар кьиле фена. Абуру идалай вилик малумарай пландин 20 пункт ва экономикадиз талукь бязи месэлаяр веревирдна. Рахунар 15-декабрдизни давам хъхьана. Дональд Трампан махсус илчи Стивен Уиткоффа малумарайвал, веревирдер метлеблубур хьана.
«РБК-Украина» чешмеди телеграм-каналда хабар гайивал, Украинадинни США-дин векилрин арада гуьгъуьнлай Зеленский галачиз рахунар давам хъхьана. Гьа са вахтунда Зеленскийди вичи иштиракай рахунар регьятбур тахьайди хиве кьуна. Адан фикирдалди, «меслят хъувуна кIанзавай месэлаярни ама».
РикIел хкин, Вашингтондин теклифар декабрдин эвел кьилера РФ-дин Президент Владимир Путина Стивен Уиткоффахъни Дональд Трампан езне Жаред Кушнерахъ галаз Кремлда веревирднай.
Гуьгъуьнлай В.Путина малумарайвал, Вашингтондин сифтегьан планда къалурнавай бязи месэлайрихъ галаз Москва рази туш.
Алатай гьафтеда Д.Трампа инанмишвилелди къейд авурвал, Зеленскийди США-ди малумарнавай ислягьвилин пландин тереф хуьзвач.
«Лезги газет»
