Мад гьужумзава

Израилдин кьушунри Газадал гегьенш гьужумар ийиз­ва. Женгерин серенжем ислендин экуьнахъ башламишна. Сифтедай ЦАХАЛ-ди шегьердиз ягъунар кьуна, гуьгъуьнлай аниз танкар гьахьна. «РИА Новос­ти» чешмеди хабар гузвайвал, къад декьикьада Газадал 37 сеферда гьужумна, гьа жергедай яз вертолет­рин куьмекдалдини. Нетижада 62 агьали телеф хьана.

Къейд ийин, Россиядин гьукумдарри Израилдин гьерекатар тахсиркарвилинбур яз гьисабзава.

Акъудуниз эвер гана

Арабрин ва исламдин уьлквейри ООН-да Израилдин членвал акъвазурун патал сад хьуниз эвер гана. «РИА Новости» чешмеди хабар гузвайвал, ихьтин фикир Катарда кьиле фейи саммитдин нетижада тестикьарай декларацияда лагьанва.

ОИС-дин (Организация исламского сотрудничест­ва) регьберри ва арабрин уьлквейрин лигади кьабулна­вай документдай малум жезвайвал, саммитдин иштиракчийри 1967-йисалай Тель-Авивди гужуналди къа­къуд­навай мулкарилай са гьихьтин ятIани багьнай­рал­ди Палестинадин халкь чукурунин алахъунар ба­тIул­ви­линбур яз гьисабзава.

Къейдзавайвал, Мукьвал тир РагъэкъечIдай пата адалатлу ва дурумлу ислягьвили агъавалун патал­ Палес­тинадин месэла фикирдай акъуд тавун ва анин агьалийрин ихтиярар чIур тавун лазим я. ГьакIни ислягь­вал патал арачивалзавайбур шупIардай алахъунар авуни, абуруз аксивилер къалуруни дуьз макьсаддив агакьардач.

Аксивилер давамарзава

США-дин госсекретарь Марко Рубиоди «Fox News» изданидиз гайи интервьюда лагьанвайвал, Америкадин гьукумдарриз Россиядиз акси яз малумарун мумкин тир цIийи санкцийрик Евросоюзни экечIна кIанзава.

Идалай вилик Европадин бязи уьлквейри Россия­дин туристар чпин чилерал атунал къадагъа эцигиз кIан­завайдакай хабар ганай. Бязи чешмейри тестикьар­за­вайвал, санкцийрин 19 лагьай серенжемрик россияви­яр шенгендин визайрин жигьетдай мадни кIевера тун ква.

15-сентябрдиз Америкадин бизнесдин векилри Дональд Трампавай Россиядиз акси яз малумарнавай санкцийрин бязи паяр къуватдай вегьин тIалабна.

Сербияда гъулгъула

Гьукумдин кьилиз чпихъ галаз рекье фидай сиясат­чи­яр гъунин мураддалди Евросоюзди Сербияда къат­ма-къаришдин майдан тешкилуник кьил кутунва. «РИА Новости» чешмедин делилралди, ихьтин фикир Рос­сиядин СВР-ди (къецепатан разведкадин къуллугъ) малумарнава.

Къейдзавайвал, Брюсселдин регьберриз Сербиядин гьукум чпин чIалаз килигдай, чпиз муьтIуьгъ жедай касдин ихтиярда тваз кIанзава.

СВР-дин делилралди, Сербиядин чалпачух гьалара­ студентри активнидаказ иштиракзава. Европадин экуь гележегдикай рахуналди, жегьилрин мефтIер ацIур­­­зава ва идакай чпиз менфят хкудзава. «Евросоюз­диз такабурлу ва садвал хуьзвай Сербиядин халкь герекзавач», — кхьенва СВР-дин малуматда.

Сечкийрин йикъара

РФ-дин МИД-дин векил Р. Мирошника «ТАСС» чешмедиз ихтилат авурвал, Россияда регионрин сечкияр кьиле фейи йикъара Украинадин кьушунри гьар юкъуз­ чи регионрал ахъайзавай пилот галачир аппаратрин кьадар садрани тахьай кьван артух хьанвай.

«Гьар юкъуз ВСУ-ди Россиядин мулкара авай дяведиз талукь тушир объектар ягъунин гьерекатар артухарна, кьилди къачуртIа, суткада 530 дрон ахъайна», — лагьана ада.

Р. Мирошника идалай вилик Киев рахунар кьиле тухуз гьазур туширдакай лагьанай. Дипломатдин фикирдалди, РагъакIидай патан уьлквейри, кьилди къачуртIа, Великобританияди, Францияди ва ФРГ-ди Киевдин нагьакьан крар далдаламишзава ва анин кьиле авайбурун гьерекатар ахтармишунин месэладиз манийвал гузва.

Гьазурайди — К. Ферзалиев