Вахтуналди меслят хьана
Саласа алукьзавай йифиз США-дин президент Д. Трампа Тегеран ва Тель-Авив вахтуналди ислягьвал хуьнин икьрардал атанвайдакай малумарнай. Адан бинедаллаз 12 юкъуз дяведин женгер акъвазаруникай хабардарнай.
«РИА Новости» чешмеди хабар гузвайвал, гуьгъуьнлай Израилдин терефди вахтуналди баришугъвал малумарайдалай кьулухъ Иранди гуя ракетаяр ахъайна лагьай хабар чукIурна. Иранди лагьайтIа, Израилди кутазвай тахсирар бинесузбур, гьахъсузбур тирди тестикьарна.
«Ирандай ракетаяр ахъайна лугьузвай малуматар гьахълубур туш», — кхьенва Ирандин «IRIB» гостелерадиокомпаниядин телеграм-каналда. И малумат Ирандин яракьлу къуватрин генштабдини тестикьарна. Уьлкведин милли хатасузвилин кьилин советди малумарайвал, Тегеранди ислягьвал хуьзва, амма Тель-Авивдин патай са гьихьтин ятIани аксивал хьайитIа, жаваб гуз гьазур я.
Трампан гъалатI
Италиядин виликан премьер-министр, оппозициядин гьерекатдин регьбер Д. Контедин фикирдалди, Ирандин ядерный объектрал гьужум авуникди Д. Трампа тарихдин гъалатIдиз рехъ гана. Адан гафар «RepubbIika» газетди малумарнава.
Сиясатчиди Америкадин регьбердин гьерекатар международный ихтиярар чIурун тирди къейдна. Адан гафаралди, Вашингтонди и жуьредин ягъунрин тереф хуьни вири гьукум са касдиз ва я гъвечIи дестедиз талукь, къанунрин ва я жемиятдин гуьзчивилин сергьятар авачир государствойриз атомдин бомбайралди яракьламиш жедай себеб гузва.
Успатдай делилар авач
РФ-дин МИД-дин кьил Сергей Лаврова малумарайвал, Иранди гуя Израилдал гьужумуниз гьазурвал аквазвай лагьана тестикьардай са делилни авач. Идакай «РИА Новости» чешмеди хабар гузва.
«Жува-жув хуьникай фикир авунин серенжемривай, за гьисабзавайвал, садни ягъалмишвиле тваз жедач. Иранди Израилдал гьужумнавайвилин ва я гьужумдиз гьазур жезвайвилин гьакъиндай гьич са малуматни, са гиманни виликамаз малум хьанач», — лагьана ада.
Ада къейд авурвал, и жигьетдай гьакъикъи делилар садани гъанвач.
Президентрин гуьруьшдикай
Уьлкведин регьбердин пресс-секретарь Дмитрий Пескова къейд авурвал, Россиядинни США-дин президентри чпин гуьруьш хъсандиз гьазурун герек тирди аннамишзава.
«Президентриз алакъаяр хъсанарун патал кьилдин гуьруьш важиблу тирди чизва, амма Россиядинни США-дин алакъаяр гуьнгуьна хтунин кар, хьанвай зарар екеди хьуниз килигна, яргъалди давам жеда», — лагьана Д. Пескова «Россия 1» телеканалдин журналист П. Зарубиназ.
СБУ-дин кар алай макьсад
РФ-дин ВС-дин кьилин военно-политический управленидин начальникдин заместитель, «Ахмат» спецназдин командир Апти Алаудинова къейднавайвал, Украинадин хатасузвилин къуллугъ патал «Ахмат» спецназ кар алай макьсад я. Адан гафар «ТАСС» чешмеди раижна.
А. Алаудинова къейднавайвал, Украинадин махсус къуллугъди подразделение тергунин алахъунриз еке такьатар серфзава.
Гьазурайди — К.Ферзалиев
