Нубатдин сеферда рахана

19-майдиз Россиядинни США-дин регьберар — Владимир Путин ва Дональд Трамп — нубатдин сеферда телефондай рахана. И сеферда абурун рахунар кьве сятдилай гзаф вахтунда давам хьана. Гуьгъуьнлай Владимир Путина кьиле фейи рахунар метлеблубур, ачухбур ва менфятлубур хьайиди къейдна. Идакай «РИА Новости» чешмеди хабар гана.

Веревирд авур кьилин месэла Украинадихъ галаз алакъалуди хьана. В. Путина Россиядинни Украинадин арада ачух рахунар тешкилунин кардик къуьн кутунай Д.Трампаз чухсагъул малумарна.

Кьве уьлкведин регьберри женгер акъвазарунин ва ислягьвилин икьрар кутIунунин месэла веревирд­на. Россиядин регьберди къейд авурвал, кьве терефдини, са бязи истемишунрилай гъил къачуна, рази жедай рекьер жагъурун герек я. В. Путина къейдна хьи, кьве терефни «дуьз рекье ава», амма мумкин тир ислягьвилин ва икьрар кутIунунин муддат гьелелиг малум туш. «Кьилинди — Украинада авай четин гьаларин сифтегьан себебар арадай акъудун герек я», — лагьана Россиядин Президентди.

Кьиле фейи рахунриз гуьгъуьнлай Д. Трампани баянар гана. Адан фикирдалди, рахунар лап хъсанбур хьана ва кьве терефдиз  Украинада авай гьаларихъ галаз алакъалу яз са жерге хилерай меслятдал къведай мумкинвал хьана.

Кьилди къачуртIа, США-дин регьберди ихьтин баянар гана:

— Россия ва Украина женгер акъвазарунин гьакъиндай тадиз рахунрив-веревирдерив эгечIда;

— къалмакъал акьалтIарунин шартIар веревирд авунив мукьвал вахтара эгечIда;

— икьрардихъ галаз алакъалу шартIар Россиядини Украинади тайинарда.

Ибурулайни гъейри, Д. Трампа, женгерин гьерекатар куьтягь хьайила, Россиядинни США-дин арада гегьенш алишверишдин алакъаяр гуьнгуьна хтунин чарасузвал кьетIендаказ къейдна. «Россиядихъ кIвалахдай чкаяр арадал гъун ва агьваллувал артухарун патал гегьенш мумкинвилер ава», — лагьана США-дин президентди.

Д. Трампа Евросоюздин регьберриз ва В. Зеленскийдиз вичи Россиядиз акси санкцияр мадни артухарунин тереф хуьн тийизвайдакай малумарна. Идакай «Axios» порталди хабар гана.

«Европадин регьберри США-ди Россиядиз акси­ санкцияр кардик кутун мумкин яни лагьана хабар кьурла, Трампа им хъсан фикир туширди лагьана. Ада къейдна хьи, Путиназ Украинадин гьакъиндай икьрар кутIуниз кIанзава», — кхьенва чешмеда.

Россиядиз акси цIийи санкцияр кардик кутаз кIан­завачирдакай Трампа телефондай рахайдалай кьулухъ гьасятда журналистризни малумарнай. Ада санк­цияр ва акси маса серенжемар галачиз къалма­къал арадай акъуддай мумкинвал аваз гьисабзава.

Лаврован баян

РФ-дин МИД-дин кьил Сергей Лаврова къейд авурвал, Президент Дональд Трампахъ галаз кьиле фейи рахунра Владимир Путина Москвадин макьсад Украинада авай къалмакъалдин месэла адалатлувилелди гьялун тирди тестикьарна.

«Россияди православный инсанар Украинада бедбахтвилик тадач ва уьлкве абурун къанунлу ихтиярриз гьуьрмет ийиз тунин метлебдив агакьда», — лагьана С. Лаврова.

Дипломатди рикIел хкана хьи, Киевди 2014-йисалай Россиядихъ галаз са гьикI ятIани алакъалу вуч хьайитIани тергзава. Мадни, С. Лаврован къейд авурвал, пасхадин ва Гъалибвилин суварин вахтунда ислягьвал хуьнин ва женгер акъвазарунин теклифдал Украинади амалнач. Адан гафаралди, Киевдин ихьтин сиясат Москва патал мягьтел жедайди туш.

Европадиз къалмакъал кIанзава

США-дин госсекретарь Рубиодиз, Римдиз фидайла­, Европадин вилик-кьилик квай бязибуруз къалмакъал герекзава лугьудай фикир чир хьана. «РИА Новос­ти» чешмедин делилралди, идакай ада вичи ихтилатна­.

«Захъ галаз гуьруьшмиш хьайи са кардиналди заз Америкадин президентдиз ислягьвал кIанзавайдакай, гьа са вахтунда бязи европавийри женгинин гьерекат­риз эвер гузвайдакай ихтилатна…», — лагьана Госдепдин кьили.

Рубиоди алава хъувурвал, Трампаз оборона патал еке харжияр ийиз кIанзавач, а такьатар экономика еримлу авунихъ элкъуьриз жеда.

Гьазурайди — К. Ферзалиев