Нубатдин рахунар
Россиядинни США-дин векилрин арада нубатдин рахунар МИД-дин рекьяй кьиле фида. Ихьтин малумат РФ-дин Президентдин пресс-секретарь Д. Пескова гана. Идакай «РИА Новости» чешмеди хабар гузва.
«Рахунар чи терефдин – къецепатан крарин рекьяй министерстводин хиляй – кьиле фида. Гьавиляй хабарар гьабурувай, яни МИД-дин къуллугъчийривай вилив хуьх», — лагьана Д.Пескова 10-апрелдиз Стамбулда кьиле фидай ихтилатрикай журналистри хабар кьурла.
Алава хъувурвал, Москвадини Вашингтонди алакъаяр хъсанар хъувун патал вири къуватар желбзава.
Къейд ийин, США-динни Россиядин арада рахунар 18-февралдиз Эр-Риядда кьиле фейи гуьруьшдилай инихъ гуьнгуьна гьат хъувуна. А чIавуз кьве терефди са жерге месэлаяр веревирдна. Кьилди къачуртIа, кьве патазни хийир жедай жуьреда алакъалувилелди кIвалахунин, векилханайрин кIвалахра арадал атанвай сергьятвилер арадай акъудунин ва Украинадин гьалар къайдада туник кьил кутунин шартIар тешкилдай икьрардал атанай.
Февралдин эхирра Россиядинни США-дин векилрин арада Стамбулда кьиле фейи гуьруьшдал векилханайрин кIвалахриз пул ахъаюнин ва уьлкведай уьлкведиз самолетрин ачух рейсер гуьнгуьна хтунин мумкинвилиз талукь месэлаяр веревирднай.
Идалайни гъейри, эхиримжи кьве вацра Владимир Путин ва Дональд Трамп телефондай 2 сеферда рахана. Маса месэлайрихъ галаз санал абуру кьве уьлкведин арада алакъаяр, алакъалувилелди кIвалахунин месэлаяр веревирдна.
Япониядихъ галаз
Токиоди тухузвай мидявилин гьерекатрин шартIара Россиядинни Япониядин арада ислягьвилин икьрар кутIунунин гьакъиндай рахун гьелелиг намумкин я. «РИА Новости» чешмеди хабар гузвайвал, ихьтин фикир Д.Пескова лагьана.
«Чна гьакъикъи гьалариз фикир гузва. Гьелбетда, и шартIара са гьихьтин ятIани рахунар кьиле фин мумкин тирдакай бажагьат ихтилатиз жеда», — лагьана Кремлдин векилди.
Пескова къейд авурвал, Токио Россиядиз акси санкцийрик экечIуни а уьлкведиз ислягьвилин икьрардал къведай ашкъи авачирвилин гьакъиндай шагьидвалзава.
Есирдин ихтилат
Есирвиле гьатнавай Украинадин аскерди ихтилатайвал, эгер алай чкадилай катиз ва я чпи чеб есирвиле вугуз хьайитIа, ВСУ-дин FPV-дронрин операторри чпихъ галаз къуллугъзавай аскерриз ягъунар кьазва. Адан гафар «РИА Новости» чешмеди раижнава.
«Гзафбуру есирвиле вугунин мумкинвилер жагъурзава. Анра вири чкайра чи дронар ава. Есирвиле вугун мусибатдин кар я – жуванбуру яна рекьизва», — лугьузва украинви аскерди.
Идалай вилик Часов Ярда ВСУ-дин кьве аскерди, аксивал авунин карда агалкьунар авачиз акуна ва и гьерекатрин атIа кьил хъсан тежедайди гьисс авуналди, гуьгьуьллувилелди чеб есирвиле вугана.
Картадай къалурна
Украинадин яракьлу къуватрин гуьзчивилик кумай Курскдин областдин мулкар картадай къалурна. Идакай «Спецоперация Z: Военкоры русской Весны» телеграм-каналди хабар гузва.
Къейдзавайвал, Курскдин областдин Гуево тамамдаказ азад хъувунва. ТIвар кьунвай телеграм-каналди идалай виликни Россиядин Яракьлу къуватрихъ эхиримжи йикъара хьайи агалкьунар къалурзавай Курскдин сергьятрин карта малумарнай. Картадай аквазвайвал, ВСУ-дин аскеррин гуьзчивилик кумайди Украинадин сергьятдив гвай са гуьтIуь зул я. Женгерин нетижада Россиядин аскеррилай ВСУ-дин лап хъсанбур яз гьисабзавай аскерриз бегьем ягъунар кьаз ва ислягь агьалияр хатасуз чкадиз акъудиз алакьна.
Гьазурайди — К. Ферзалиев
