Игьтияж артух жезва
Европадин Советдин Парламентдин ассамблеядин (ПАСЕ) председатель Х. Дамса коронавирусдиз акси Россиядин “Спутник V” вакцина ЕС-диз ракъурунин месэладикай ихтилатна, хабар гузва “Интерфакс” чешмеди.
Къейдзавайвал, ЕС-ди Россиядин дарман арадал гъанвайбурухъ галаз рахунар кьиле тухузва. ПАСЕ-дин председателдин гафаралди, дарманрин такьатрин Европадин агентство и месэла чирунив эгечIнава. Чешмедин делилралди, вакцинадихъ галаз алакъалу месэла гьялун патал адан патахъай ЕС-дик квай 4 уьлкведи тIалабун лазим жеда. Адалайни башкъа, Италияда “Спутник V” гьазурдай мумкинвилер жагъурзава.
“Спутник V” аденовирусдин бинедаллаз арадал гъанвай, сифте яз регистрация авунвай, коронавирусдиз акси Россиядин вакцина я. Ам дуьньядин 50-далайни гзаф уьлквейри кьабулнава. Россиядин алимри арадал гъанвай и вакцина алай вахтунда ВОЗ-дин лап хъсан 10 вакцинадин-кандидатдин сиягьдик ква.
Британиядин вакцинадикай къерех жезва
Франциядинни Италиядин гьукумдарри Британиядин “AstraZeneca” фирмади коронавирусдиз акси яз арадал гъанвай вакцинадин рапар ягъунин кар акъвазарнава. Идакай “Reuters” агентстводи хабар гузва.
Ихьтин къарар идалай вилик Германиядин здравоохраненидин министерстводини кьабулнай. Ибурал къведалдини Евросоюздин са жерге уьлквейри тIвар кьунвай фирмадин вакцинадиз “ваъ” лагьанай. Германиядин гьукумдарри вакцина ишлемиш тахвунин делил сиясатдин серенжем туширди къейдна.
Идалай вилик британо-шведский “AstraZeneca” тешкилатди коронавирусдиз акси яз чпи арадал гъанвай вакцина хатасузди я лагьана тестикьарнай.
ЕМА-дин (Европейское агентство лекарственных средств) делилралди, 12-мартдалди ЕС-дин мулкара “AstraZeneca” тешкилатдин вакцинадин раб ягъай 3 миллион касдин арада тромбоз хьайи 22 дуьшуьш дуьздал акъатнава. Амма и агьвалатар вакцина ишлемишунихъ галаз алакъалу туш лугьудай фикирарни раижнава. ГьакI ятIани, кьиникьал атунин гьалар ахтармишун давам жезва.
ВОЗ-дин векилдин гафаралди, Европадин уьлквейрин гьукумдарри кьабулнавай къарар виликамаз игьтиятлувал хуьнин серенжем я.
Чпин месэлаяр къарагъарна кIанзава
ПАСЕ-дин вице-президент, Украинадин Верховный Рададин депутат А.Мережкоди ПАСЕ-дин председатель Х.Дамсавай Москвада Крымдинни Донбассдин тема къарагъарун тIалабнава. “Интерфакс-Украина” чешмедин делилрал асаслу яз, идакай “Лента.ру” сайтди хабар гузва.
Мережкодин гафаралди, Россиядин векилрихъ галаз ихтилатар кьиле тухудайла, ПАСЕ-дин кьиливай къарагъариз жедай са жерге месэлаяр ава. Кьилди къачуртIа, депутатдиз гуя вахтуналди къакъуднавай Крым Украинадив вахкунин, сиясатдин месэлайрихъ галаз алакъалу яз дустагънавай украинвияр азад хъувунин месэлаяр къарагъарна кIанзава.
Малум тирвал, агьалийрин иштираквал аваз 2014-йисуз кьиле тухвай референдумдин нетижада Крым Россиядик акахь хъувуна. Донецкдин ва Луганскдин областри Украинадилай аслу туширвал малумарна. Гуя уьлкведин мулкар кьазва лугьуз, Украинади Россиядик бинесуз тахсирар кутазва.
Есирар азад хъувуна
Азербайжандин къецепатан крарин министр Дж.Байрамова малумарайвал, дяведин вахтунда кьур вири есирар Бакуди эрменийрив вахканва. Идакай «Haqqin.az» чешмеди раижна.
“Пуд терефди кьабулай къарардал асаслу яз, Азербайжанди вири аскерар-есирар акси женг чIугур терефдив вахканва. Абурун кьадар Эрменистанди Азербайжандив вахкай есиррилай хейлин артух я”, — лагьана министр Байрамова.
Базадал гьужумна
Иракда авай США-дин Балад авиабазадал цавай гьужумнава. Ирандин хатасузвилин органрин чешмейрал асаслу яз, идакай “Новости” РИА-ди хабар гузва.
Къейдзавайвал, база галай патахъ кьве ракета ахъайна. Амма абур баябан чилел хъиткьинна. Кьейибур ва барбатIвилер хьанач.
Иракдин кеферпата авай США-дин базадал ва адан патав гвай аэропортунал февралдизни гьужумнай. А чIаван ягъунрин нетижада са кас кьена, иридал хирер хьана.
«Лезги газет»
