Къарабахда гьалар секин хьанвач
Азербайжандин яракьлу кьушунри Дагълух Къарабахдин кьиблепатахъ фидай мулкара гегьенш гьужумрик кьил кутунва. Идакай, Эрменистандин оборонадин министерстводин делилрал асаслу яз, “Новости” РИА-ди хабар гузва.
Эрменистандин премьер-министр Н.Пашиняна тестикь хьанвачир Дагълух Къарабахдин президент А.Арутюнянахъ галаз Къарабахда совещание кьиле тухвана. Къарабахдин оборонадин министр Д.Арутюняна душманриз жавабдин ягъунар кьурдакай ва гележегда кьилиз акъуддай женгерин гьерекатрикай Эрменистандин премьердиз ихтилатна.
Къарабах себеб яз Бакудинни Еревандин арада къал-къиж, гьуьжетар аваз 30 йис я. 27-сентябрдилай инихъ гьалар къизгъин хьана. Гьужумар авунин, ягъунар кьунин жигьетдай кьве терефдини сада муькуьдак тахсирар кутазва.
ЧIехи пай агьалияр эрменийрикай ибарат тир Къарабахди 1991-йисуз Азербайжандилай аслу туширвал малумарна. Россиядин арачивал аваз, 1994-йисуз Азербайжанди, Эрменистанди ва Къарабахди баришугъвилиз, меслятвилиз талукь протоколдал къулар чIугуна. ЯтIани, а чIавалай инихъ давам жезвай гьуьжетарни къалмакъалар къени яваш хьанвач.
И йикъара РФ-дин къецепатан крарин министр С.Лавров Ирандин къецепатан крарин министр М.Зарифахъ галаз Къарабахдин къалмакъалдин патахъай телефондай рахана. Абурун фикирдалди, столдихъ ацукьна, веревирдер авуртIа, арада авай къалмакъалдал эхир эцигиз жеда. Амма и кар патал сифте нубатда, сада-садаз шартIар эциг тавуна, тамамвилелди женгерин гьерекатар акъвазарун лазим я.
Киргизияда чалпачух
Халкьдин гегьенш къатарин наразивилин гьерекатар кьиле физвай вахтунда Киргизиядин премьер-министр дегишарна. “Лента.ру” чешмедин делилралди, парламентдин членри премьер-министрвиле вахтуналди яз виликан депутат С.Жапаров тайинарна.
Киргизияда 4-октябрдиз парламентдин сечкияр кьиле фена. Сечкийрин официальный нетижаяр малумарайдалай кьулухъ халкьдин арада наразивилер, къал-къиж гьатна. Чалпачух гьалар себеб яз са инсан кьена, 600-дав агакьна ксариз хасаратвилер хьана.
Наразивал малумарзавайбуру парламентдин дарамат ва президентдин офис кьуна, уьлкведин виликан кьил А.Атамбаев СИЗО-дай азад хъувуна. ЦИК-ди сечкийрин нетижаяр дуьз туширбур яз гьисабна.
Мад гзаф жезва
Гьар юкъуз коронавирус акатзавайбурун кьадар чи уьлкведа мад артух жезва. Эхиримжи 3-4 йикъан рекъемар майдин вацранбуруз барабар хьанва. Гьалар хъсан туширвиляй бязи регионра са кьадар сергьятвилин серенжемар кардик кухтазва. Москвадин мэрдин заместитель А.Раковади «ТАСС» чешмедиз хабар гайивал, коронавирус акатзавайбурун кьадар артух хьун инсанри маскаяр алукI тавунихъ галаз алакъалу я.
7-октябрдин делилралди, Россияда коронавирус акатнавайбурун кьадар 1 248619-дав агакьнава, абурукай 21865 кас кьенва, 995275 — сагъар хъувунва.
Алакъаяр атIудач
Украинадин МИД-дин кьил Д.Кулебади Белоруссиядихъ галаз амадагвилин алакъаяр атIунин са себебни, бинени авач лагьана.
“ВВС News Україна” чешмедин делилралди, Украинадин гьукумдин фикир Белоруссиядин терефдихъ галаз жезвай официальный гуьруьшар тIимиларуникай ибарат я. Экономикадин жигьетдай сада-садахъ галаз алакъалувилелди крар кьилиз акъудуникай рахадайла, Кулебади Украинадиз Белоруссиядал “гьужумдай” фикирар авачирди лагьана. Гьа са вахтунда ада тестикьарайвал, ЕС-ди Белоруссиядиз талукьарзавай санкцийриз Украинадини шериквалда. Адан фикирдалди, ихьтин гьалара рейсадвал къалурун важиблу я.
Евросоюзди Белоруссиядиз акси санкцияр кардик кутунвайдакай 2-октябрдиз малумарнай.
Италияди игьтият хуьзва
Италиядин гьукумдарриз тIугъвал себеб яз уьлкведа кардик кутунвай сергьятвилерин муддат къведай йисан 31-январдалди артухар хъийидай фикир ава. Ихьтин фикир анин здравоохраненидин министрди “Радио Sputnik” чешмедиз раижна.
Адан фикирдалди, авай гьалариз килигайла, сергьятвилерин муддат артух хъувуникай менфят хкатда.
Вакцинадин къимет
ФАС-ди (Федеральная антимонопольная служба) Россияда арадал гъанвай коронавирусдин вакцинадин къимет малумарна. ФАС-дин кьил И.Артемьеван гафаралди, вакцинадин са дозадин къимет агъзур манатдилай виниз жедач. Идакай “Лента.ру” чешмеди хабар гузва.
“Алай вахтунда вакцина гегьеншдаказ арадал гъидай мумкинвал авач. Гележегда адан къимет анжах агъуз аватда”, — лагьана Артемьева.
«Лезги газет»
