Духтурриз такьатар чара авуна
РФ-дин гьукуматди коронавирусдин тIегъуьндин шартIара кIвалахзавай духтурриз 10,8 миллиард манат чара авунва. “Известия” чешмеди хабар гузвайвал, идакай вице-премьер Татьяна Голиковади малумарна.
Идалай вилик гьукуматди ФМБА-диз (Федеральный медико-биологический агентстводиз) коронавирусдихъ галаз женг чIугвазвай духтурар руьгьламишдай такьатар гун патал 320 миллиондилайни гзаф пул чара авунвайдакай хабар ганай. Кьилди къачуртIа, пулдин такьатар коронавирус акатнавай ксариз куьмек гайибуруз, азар акатунин хаталувилик акатайбуруз ва Россияда вирус чукIуниз аксивалунихъ галаз алакъалу яз кьабулнавай серенжемар себеб яз къизгъин гьалара кIвалахзавай духтурриз-пешекарриз гудайвал я.
9-апрелдин нянин вахтунин делилралди, COVID-19 коронавирус акатнавайбурун кьадар дуьньяда 1 446 557-дав агакьнава, 83 149 кас кьенва, 307 982 — сагъар хъувунва. Россияда 8672 кас коронавирус акатнавайбур яз тестикьарнава, 63 кас кьенва, 580 — сагъар хъувунва. ТIегъуьн чукIунин вилик пад кьунин макьсаддалди, РФ-дин Президент В. Путина чи уьлкведа апрель кIвалах тийидай варз яз малумарна.
Самолетар ракъурна
Коронавирусдихъ галаз женг чIугун патал Россияди ВКС-дин цIусад Ил-76 самолет Сербиядиз ракъурна. РФ-дин оборонадин министерстводин делилар “Интерфакс” чешмеди раижна.
Сербиядиз 87 военный къуллугъчи, гьа жергедай яз радиациядин, химиядин ва биологиядин жигьетдай хуьдай кьушунрин военный духтурар, пешекарар-вирусологар фена. Идалайни гъейри, Сербиядив 16 военный техника, медицинадин махсус тадаракар ва сагъламвал хуьдай маса такьатар агакьна.
Къейд ийин, РФ-дин Президент В. Путина, Сербиядин регьбер А. Вучичахъ галаз телефондай рахайдалай кьулухъ, куьмек гунин къарар кьабулна.
Д. Хопкинсан университетдин проектдин делилралди, Сербияда 1476 касдик коронавирус акатнава, абурукай 39 кьена.
Гьалар къизгъин туш
Белоруссиядин президент А. Лукашенкоди коронавирусдикди начагъ хьанвайбур сагъар хъувун патал вич гьазур тирди лагьана. Идакай “БЕЛТА” чешмеди хабар гузва.
Ада гьукуматдин совещанидал азарлубур сагъар хъувунин месэла вичи здравоохраненидин министрдихъ галаз веревирд авунвайдакай ва, герек атайтIа, чеб кьведни инсанар сагъар хъувун патал азарханадиз фидайдакай ихтилатна. Амма министрди гьелелиг ахьтин лазимвал авачирди малумарна.
Лукашенкоди къейд авурвал, гьукуматди тIегъуьндихъ галаз секиндаказ ва иердаказ женг чIугун герек я. Гьа са вахтунда гьукумдарри гьар са кас къутармишун патал вири жуьредин алахъунар ийида. Ада гьакIни хабар гайивал, республикада коронавирус чукIунихъ галаз алакъалу мусибатдин гьалар авач. Идалай вилик, 31-мартдиз, Лукашенкоди Витебскдин областда садакай масадак акатдай азар пайда хьанвайдакай ихтилатнай. Амма республикада карантиндин серенжемар кардик кутадай къарар кьабулнач.
Белоруссиядин бязи духтурри властри коронавирус чукIунихъ галаз алакъалу якъин информация чуьнуьхзава лагьана тестикьарзава. Эхиримжи делилралди, Белоруссияда коронавирус акатнавайбурун кьадар 700-дав агакьнава, 13 кас кьенва.
ШартI малумарнатIани…
Россиядин машгьур спортсмен Гьабиб Нурмегьамедован тренер Хавьер Мендеса америкави Тони Фергюсонахъ галаз бягьс тухунин шартI малумарна. Адан фикир “Ienta.ru” сайтди раижзава.
Малум тирвал, какахьай жуьредин женгерин машгьур кьве спортсмендин арада 18-апрелдиз США-да бягьс кьиле фин лазим тир. Амма эхиримжи йикъара дуьньяда арадал атай вакъиаяр себеб яз, бягьс кьиле тефинни мумкин я.
Идалай вилик Мендеса малумарайвал, бягьс кьиле тухунин икьрар официальнидаказ къуватдай вегьенвач. Ада UFC-дин президент Д. Уайта нубатдин турнир кьиле тухудай цIийи чка малумарун вилив хуьзва.
“Эгер чка тайинар тавуртIа, чна бягьс сентябрдал ахкъудун ва ам Сан-Францискода ва я Абу-Дабида кьиле тухун гуьзетда”, — лагьана Х. Мендеса.
Къейд ийин, и йикъара Гь.Нурмегьамедова коронавирус себеб яз бягьс кьиле тефин мумкин тирдакай хабар ганай. Нурмегьамедовани Фергюсона чпин алакьунар къалурдай чемпионвилин бягьс кьилиндаз элкъуьн лазим тир турнир чи ватандашдин иштираквал авачиз кьиле фин мумкин я.
Гуьгъуьнлай Д. Уайта къейд авурвал, 18-апрелдин турнир Нурмегьамедов галачиз кьиле фида. Дагъустанвидин чкадал Фергюсонахъ галаз америкави Джастин Гэтжиди бягьс кьиле тухуда. Абурун арада гъалиб хьайидакай вахтуналди тир UFC-дин чемпион жеда.
Бейхабардиз арадал атай гьалар себеб яз, Д.Уайта Гь.Нурмегьамедовак са тахсирни кутазвач.
Гьазурайди — К. Ферзалиев
