29-майдиз Дагъустандин Кьил Сергей Меликов Чар гваз республикадин Халкьдин Собранидин вилик рахада. Идакай «Лезги газетдиз» РД-дин Кьилин пресс-къуллугъди хабар гана.
Мярекатда, адет тирвал, Халкьдин Собранидин ва РФ-дин Госдумадин депутатрилай гъейри, гьукумдин органрин регьберри, жемиятдин векилри, журналистри, блогерри ва масабуру иштиракда.
Сергей Меликова вичин Чарче республика вилик тухунин жигьетдай асул ва кар алай месэлаяр тайинарда. Вилив хуьзвайвал, СВО-дин иштиракчийриз ва абурун хизанриз куьмекар гунин, цIийи карханаяр, яшайишдин объектар эцигунин, туризм, аграрный хел вилик тухунин месэлайриз иллаки кьетIен фикир гуда.
РД-дин Кьилин пресс-къуллугъдин малуматралди, Сергей Меликов депутатрин вилик къенин йикъан хци месэлайрикайни рахада: набутризни етимриз кIвалер чара авуникай, рекьера улакьрин гьерекатдал гуьзчивал тухун патал кардик кутунвай камерайрикай, Махачкъалада имам Шамилан тIварцIихъ галай куьче цIийикIа туькIуьр хъувуникай ва икI мад.
Къейд ийин хьи, ачух эфирдин куьмекдалди Сергей Меликован рахунрихъ вири дагъустанвийривай яб акализ жеда. Мярекатдин эхирдай республикадин Кьили журналистрихъ галаз гуьруьшни кьиле тухуда.
Агьмед Магьмудов
