2026-йисуз Дагъустанда государстводин нетижайрин аттестация (ГИА) кьи­ле фейи гьалдиз республикадин премьер-министрдин везифаяр вахтуналди тамамарзавай Мегьамед Рамазанован регьбервилик кваз алатай ислендиз кьиле тухвай РД-дин Гьукуматдин заседанидал килигна.

М. Рамазанова къейд авурвал, имтигьанрин серенжемар цIи адетдин къайдада кьиле фена. «100 балл къачурбурун кьадар артух хьана. Сифте яз чи выпускницади 300 балл къазанмишна. Им, са шакни алачиз, вини дережадин нетижа я. Агъа кIанин баллрин кьадар къазанмишиз тежезвайбурун ва имтигьан вахкуз тахьайбурун кьадарни тIимил хьана», – лагьана ада ва имтигьанар гьахълувилелди, михьивилелди тешкилун кар алай месэла яз амукьзавайди къейдна.

Заседанидал алакьунар авай аялриз и ва я маса хиляй дерин чирвилер къачудай мумкинвилерни шартIар арадал гъунин важиблувал къейдна.

Дагъустандин образованидинни илимдин министрдин везифаяр вахтуналди тамамарзавай Ягья Бучаева къейд авурвал, 2026-йисузни, са йис идалай вилик хьиз, выпускникриз хайи чIаларайни эдебиятрай ГИА вахкудай мумкинвал ганвай. Амма ОГЭ-дин иштиракчийри им­тигьанар вахкун патал и предметар хкягъуниз артух фикир гузвач.

М. Рамазанова и жигьетдай имтигьанар хкягъуниз бегьем фикир тагунин себебрай кьил акъудун ва республикадин­ са шумуд муниципалитетда хайи чIа­ла­рай тарсар гудай даяхдин мектебрин сетар арадал гъунин месэладал кIва­лахун тапшурмишна.

Адан гафаралди, даяхдин мектебар арадал гъун, хайи чIалан тарсар гунин рекьяй кIвенкIвечи мектебар чара авун ва анра хъсан тежрибаяр раижун, ачух тарсар ва вебинарар тешкилун герек я. Асул везифа мектебра кIелзавайбуру хайи чIа­лар чируниз ийизвай итиж артухарун­ ва Дагъустандин чIаларин жуьреба-жуь­ре­вал хуьн ва еримлу авун патал шартIар арадал гъун я.

РикIел хкин, идалай вилик Дагъустандин Кьил Фёдор Щукина регионда кардик квай аялрин 37 бахчада милли чIалар чирунин майданар тешкилуниз талукь проект кардик кутунвайдакай хабар ганай.

Салим  Салимов