11-16-июндиз Дагъустанда фольклордин, адетдин медениятдин вири халкьарин «Дагъвияр» фестиваль ХХIII сеферда яз кьиле фида. Идакай чаз РД-дин Гьукуматдин пресс-къуллугъди хабар гана.
Дагъустан Республикадин Гьукуматдин Председатель Абдулмуслим Абдулмуслимова къейд авурвал, медениятдин чIехи вакъиади миллетрин медениятрин девлет, дагъустанвийрин мугьманпересвал неинки уьлкведин сергьятра, гьакI адалай къецени раиждай мумкинвал гузва. ЦIи фестивалда къецепатан уьлквейрайни яратмишзавайбурун дестейри иштиракда: Белоруссиядай, Узбекистандай, Туьркменистандай, Кьиблепатан Осетиядай, гьакIни Россиядин 20-далай гзаф регионрай.
Фестиваль Дербент, Къизилюрт, Каспийск, Хасавюрт шегьерра, гьакIни Мегьарамдхуьруьн, Къули, Акъуша, Къизляр, Хунзах, Хасавюрт, Буйнакскдин районра тешкилда. «Дагъвияр» фестиваль чи регионда Дагъустандин Кьилин, РД-дин Гьукуматдин, Россиядин медениятдин министерстводин, В.Д. Поленован тIварцIихъ галай Россиядин халкьдин яратмишунрин кIвалин куьмекдалди тешкилиз гзаф йисар я.
«Лезги газет»
