И йикъара РД-дин Кьил Сергей Меликова «Комсомольская правда» газетдин журналист Валентин Алфимоваз Дагъустандин экономика вилик фини­кай, яшайишдин проектар кьилиз акъу­дуникай ва гележегдин планрикай ихтилатна. 

Журналистди хьанвай нетижайрикай ихтилат авун тIалабайла, региондин Кьили къейдна: «Конституцияди, Президентди тайинарнавай муддат ава – къуллугъ кьилиз акъудунин муддат. Нетижаяр, заз чиз, и муддат акьалтIайдалай кьулухъ кьаз жеда. Инал за жуван кIвалахдиз талукь яз лугьузва. Эгер чун исятда кьилиз акъудзавай тапшуругърикай рахайтIа, гьа­бурузни тайин муддатар ава. Мисал яз, 2022-йисуз чна 2030-йисалди Дагъус­тан Республика яшайишдинни экономикадин рекьяй еримлу авунин стратегия туькIуьрна. А месэлаяр вири вад йисан къене гьялна акьалтIариз жедайбур туш. Вилик эцигнавай тапшуругъар гьялдайла, хейлин маса месэлаяр дуьздал акъатзава», — къейдна ада.

Интервьюда С. Меликова аскервиле къуллугъзавайбуруз, абурун хизанриз гузвай куьмекрикайни гегьеншдиз ихтилатна. Вич военный къуллугъар кьилиз акъуднавай кас яз, авай гьалар адавай хъсандиз аннамишиз жезва. «Военный тапшуругърилай гъейри, яшайишдин са гьихьтин ятIани месэлаяр гьялун патал кьулухъ вил ягъун герек туширди аскердиз чир хьун гзаф важиблу я. Женг чIугвазвай аскердиз, офицердиз адан хизандин патахъай къайгъударвал ийизвайди, вичин женгинин тапшуругъар кьилиз акъуддалди аялрихъ, яшлу диде-бубадихъ, багърийрихъ галаз алакъалу месэлаяр гьялиз куьмек гузвайди адаз чир хьун герек я. Игитвилелди телеф хьайибурун багърийризни чеб фикир тагана тан тийидайди чир хьун важиблу я», — лагьана республикадин Кьили.

РикIел хкайвал, военный къуллугъ кьилиз акъудзавайбур ва абурун хизанар патал Дагъустанда «Чун санал ала» фонд кардик ква. С. Меликова дяведин махсус серенжемда телеф хьайи аскеррин мукьва-кьилийрихъ галаз мукьвал-мукьвал гуьруьшар кьиле тухузва, абурун месэлайриз, тIалабунриз фикир гузва, абуруз куьмекун патал талукь идарайрин кьилериз тапшуругъар гузва.

Интервьюдин вахтунда С. Меликова республикада футбол машгьур жезвайдакай, жегьилар спортдал желбунин карда кьилиз акъудзавай крарикай лагьана. И жигьетдай ада Дагъустанда «Мектебда футбол» федеральный программа кьилиз акъудун мисал яз гъана.

Чи  мухбир