24-майдиз футболдай Россиядин премьер-лигадин 2024/2025-сезон акьалтIна. И юкъуз акъажунра иштиракзавай вири командайри эхиримжи къугъун кьилиз акъудна ва гьар команда халар (очки) артухарун патал алахъна. Чемпионвал къачунин бягьс цIи футболдин «Краснодар» ва «Зенит» клубрин арада кьиле фена. Нетижада 67 хал къазанмишай «Краснодар» команда тарихда сифте яз чемпионвилин тIварцIиз лайихлу хьана. Кьвед лагьай чкадал «Зенит» (66 хал) ва пуд лагьай чкадал «ЦСКА» (59 хал) хьана.
Махачкъаладин «Динамо» командади и юкъуз Каспийскда авай «Анжи Аренадал» «Ростов» командадихъ галаз кьиле тухвай къугъун 1:1 гьисабдалди акьалтIна. Нетижада чибур акъажунрин таблицада 11-чкадал хьана ва нубатдин сезонда иштиракдай мумкинвал амукьна. Къейд ийин, чи республикадин «Динамо» команда уьлкведин вини дережадин лигадиз сифте яз шаз акъатнавай.
Командадин агалкьунрикай РД-дин Кьил Сергей Меликова вичин телеграм-каналда ихтилатна. «Сифте сеферда яз лигада къугъвай чи командади, къведай сезондани уьлкведин кьилин дивизионда иштиракдай мумкинвал таъминаруналди, къугъунин рекьяй вини дережа къалурна. Вири футболистриз, тренеррин дестедиз ва килигзавайбуруз ихьтин тафаватлу нетижа за мубаракзава», — кхьенва С. Меликова.
Ада алава хъувурвал, акъажунрин таблицада чи команда мадни вине хьун мумкин тир. Адан фикирдалди, бязи дуьшуьшра тежриба бес хьанач, маса дуьшуьшра судьяйрин къарарар «са жуьрединбур» хьана. Амма командади кьилин везифа тамамарна.
Гуьгъуьнлай Сергей Меликова футболдин «Краснодар» клубдиз ва адан сагьиб Сергей Галицкийдиз чемпионвал рикIин сидкьидай тебрикна.
Лезги Фетгьуьллагь
