И йикъара РД-дин Кьил Сергей Меликова важиблу месэлаяр веревирд авур са шумуд гуьруьш кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.
Региондин регьберди тешкилатрин «Ромекс» кIватIалдин президент Алексей Прокопенкодихъ галаз кьиле тухвай гуьруьшдин вахтунда логистикадин хиле саналди кIвалахунин месэла веревирдна. Малум хьайивал, «Ромексди» Дагъустанда «Озондин» логистикадин центр эцигда.
Россиядин регионра гзаф кьадар метягьар саналди маса гунин-къачунин ва паюнин центраяр эцигунин барадай хъсан тежриба раижнавай «Ромексди» Дагъустанда 9,5 миллиард манатдилай артух инвестицийрин проект кьилиз акъудда. Ам недай-хъвадай ва гьар жуьре маса метягьрин уртах склад эцигуникай ибарат я, гуьгъуьнлай ам Россиядин чIехи ритейлеррикай сад тир «Озонди» кирида къачуда.
РикIел хкин хьи, Сергей Меликовни Алексей Прокопенко алакъалувилелди кIвалахунин жигьетдай 2023-йисуз кьиле фейи Петербургдин вири халкьарин экономикадин форумдин (ПМЭФ) майданрал икьрардал атанай. Меслятдал атунин нетижада индустриядин «Тюбе» паркунин мулкара проект кьилиз акъудун патал чилин участокни чара авуна ва тешкилат гьасятда эцигунрин кIвалахрив эгечIна.
Вилив хуьзвайвал, тIвар кьунвай проект кьилиз акъудунин сад лагьай паюна кIвалахдай 25 чка арадал гъидай мумкинвал гуда, «Озон» тешкилат кIвалахдив эгечIайдалай кьулухъ — тахминан 2 агъзур чка. Ихьтин центр арадал гъуни республикадин мулкара интернет-алвер артухаруниз ва метягьар агакьарунин вахт тIимиларуниз куьмекда.
С.Меликова проект кьилиз акъудун хъсан еришралди вилик физвайди къейдна: «Шад жедай кар: чна къарар кьабулайдалай кьулухъ алатнавайди анжах са йис я, амма сифтегьан нетижаяр чаз аквазва. И проект Дагъустан патал пара важиблу я: халкьдиз ерилу къуллугъар ийидай сетдин чIехи тешкилатар республикадиз герекзава. И карда чна квек еке умудар кутазва. Шак алачиз, проект кьилиз акъуддай чIавуз месэлаярни арадал къведа, амма республика вичин патай абур гьялунин рекье алахъунар ийиз ва квез хъсан шартIар тешкилиз гьазур я».
Вичин нубатдай «Ромекс» ГК-дин президентди тереф хуьнай С.Меликоваз разивилин гафар лагьана: «Республикада кIвалахдай мумкинвал гунай сагърай. Куь къуллугъчийри чаз гьар са чIавуз куьмек гузва, абур чахъ гала. И жуьреда тереф хуьникди гележегдин центрадин хандакIдин са пай гьазур хьанва. Мукьвара чун дарамат хкажунал элячIда».
Кьве терефни проект кьилиз акъудунихъ галаз алакъалу месэлаяр саналди гьялунин икьрардал атана.
* * *
Республикадин Кьили 10-июндиз «Салаватстекло» АО-дин директоррин Советдин председатель Радик Султановахъ галаз гуьруьш кьиле тухвана.
Гуьруьшдал шуьше ва шуьшедин продукция арадал гъизвай Россиядин чIехи тешкилатдихъ галаз республикади алакъалувилелди кIвалахунин месэла, адак акатзавай «Салаватстекло Каспий» карханадин алай вахтунин кIвалах ва ам еримлу авунин мумкинвилер веревирдна. Гьа жергедай яз, ахъайзавай суьрсетдин жуьреба-жуьревал гегьеншаруникайни рахана. Веревирд авур муькуь темайрикай сад Дагъустандинни Башкортостандин арада милливилин алакъаяр мягькемарун тир.
— Башкортостандин векилди къенин регьят тушир вахтунда чи уьлкведин экономикадин хел мягькемарун патал мумкинвал ва къуват жагъурун шад жедай кар я. Вучиз лагьайтIа, куьне къе кьиле тухузвай кIвалах кар алайди я, инал ихтилат анжах шуьше гьазуруникай, проектрикайни теклифрикай ваъ, санлай Россиядин экономика еримлу авуникай физва, идакай и йикъара чи Президентдини форумдал лагьанай, — мугьман тебрик авуналди, къейдна Сергей Меликова.
Вичин нубатда Радик Султанова лагьана: «Чахъ важиблу макьсадар ва тапшуругъар ава. Санлай къачурла, чавай абур гьялиз жезва. Гьа са вахтунда чна, чун патал дуствилин алакъаяр авай уьлквеяр яз, амайбурухъ галазни арада авай алакъаяр гегьеншарзава».
Гуьруьшда РД-дин промышленностдин ва алишверишдин министр Низам Халилова, «Салаватстекло» АО-дин генеральный директордин заместитель Маргарита Васильевади, «Салаватстекло Каспий» ООО-дин генеральный директор Фаниль Гумерова иштиракна.
«Салаватстекло» дакIаррин ва маса жуьреба-жуьре шуьшеяр арадал гъизвай Россиядин чIехи кархана я. Ада 20-далай виниз уьлквейра кIвалахзава.
Салим Салимов
