Дагъустанда федеральный «Кавказ» шегьредин (Р-217) Хасавюрт шегьердин къерехдай тухузвай участок цIийиз туькIуьрунин кIвалахар башламишнава. И кар къейд авун яз, рикIел хуьнин капсула тайинарунин мярекатда РД-дин Кьил Сергей Меликова, федеральный рекьерин агентстводин регьбер Роман Новикова ва «Упрдор «Кавказ» ФКУ-дин начальник Александр Лукашука иштиракна.
Федеральный «Кавказ» рехъ региондин транспортдинни рекьерин къурулушда асул чка кьазвай шегьре я: анай Азербайжандиз ва Мукьвал тир РагъэкъечIдай патан уьлквейриз пар ва пассажирар тухузва.
Кьуд зулуникай ибарат, IБ жуьредин алай аямдин участок (21 километр) шегьердилай къерехдай тухунин къарар кьабулун Хасавюртдиз гьахь тавуна физвай машинрин гьерекат къулайди авунихъ, гьа са вахтунда шегьердин къенепата гьерекатзавайбуруз четинвилер арадал гъун тавунихъ галаз алакъалу я. ЦIийиз туькIуьрзавай участок Ярык-су вацIалай элячIдай муькъуькай, вад путепроводдикай, ракьунни бетондин 1,3 км цларикай, маларивай элячIиз жедай вад чкадикай, гьакIни яд къерехриз акъуддай ва михьи ийидай тадаракрикай ибарат жеда.
Машинри гьерекат ийидай зулунин гьяркьуьвал, санлай къачурла, 15 метрдиз, гьар сад кьилди 3,75 метрдиз барабар жеда. Къаршидиз къвезвай рекьер бетондин жугъундалди чара ийида. Объект 2028-йисуз ишлемишиз вахкудайвал я.
Жасмина Саидова
