Дагъустанда Россиядин мулкарал кивийрин виридалайни чIехи багъ кутунва. 20 гектардин майданда экIя хьанвай цIийи багъ Дербент райондин Авадан хуьре ава. Ам виликдай Россияда виридалайни чIехиди яз гьисабзавай шуьмягърин багъ арадал гъайи «Полоса» карханади (майишат СтIал Сулейманан районда ава) кутунва.

«Полоса» ООО-дин кьилин агроном Виктор Храпова хабар гайивал, багъ кутадалди вилик чкадин шартIар кивидин кьетIенвилерихъ галаз кьадани, кьадачни тамамдиз чирна. И кардал чпихъ и рекьяй хъсан тежриба авай пешекарар желбнавай. Ахтармишунрин нетижада багъ Авадан хуьруьн мулкара кутадай къарар кьабулна.

Къейд ийин хьи, сифте яз ина кивидин багъ 2023-йисан гатфарихъ 5 гектарда кутуна. 2024-йисан гатфарихъ лагьайтIа, багъдин майданрин кьадар 20 гектардив агакьарна. Агрономри къейдзавайвал, кивидин къелемар берекатлу лезги чилел хъсандиз экъечIзава.

Чи мухбир