2023-йис Дагъустанда маса къачузвай хуьруьн майишатдин техникадин кьадар гзаф хьунинди тир лагьайтIа жеда. Республикадив агакьнавай техникадин умуми къимет 1,1 миллиард манатдиз барабар хьана.
Им 2022-йисан кьадардилай 165 процентдин гзаф я. Маса къачузвай хуьруьн майишатдин техникадин кьадар федеральный лизингдин гьисабдай гзафариз алакьна — санлай къачур кьадардикай адан пай 57 процентдив агакьзава. Майишатри техникадин парк гьакIни хсуси такьатрихъ цIийи хъувуна, бязи шейэр лагьайтIа, кредитрин куьмекдалди маса къачуна, хабар гузва РД-дин хуьруьн майишатдин ва недай суьрсетдин министерстводин информациядин къуллугъди.
Хуьруьн майишатдин техникадин бине мягькемарунин месэладиз кьилин фикир СтIал Сулейманан, Дербент, Къизляр, Хасавюрт, Тарумовский ва Къизилюрт районра гузва.
Санлай къачурла, 2023-йисан вахтунда Дагъустандин 21 райондин 69 майишатди чпин машинринни тракторрин парк цIийи хъувуна. Хуьруьн майишатдин 449 машин, гьа гьисабдай яз 154 трактор ва техил кIватIдай 8 комбайн маса къачуна. Ида хуьруьн чкада кIвалахдин цIийи 100 чка арадал гъидай, агротехникади истемишзавай вахтунда хуьруьн майишатдин 15 агъзур гектардилай гзаф чилер гьялдай ва 3 агъзур гектардилай гзаф майданрай техил вахтунда кIватI хъийидай мумкинвал гана.
2024-йисуз маса къачузвай хуьруьн майишатдин техникадин кьадар 1 миллиард манатдин къиметдиз барабар хьун лазим я. Алатнавай вахтунда майишатри «Росагролизинг» АО-дин куьмекдалди, лизингдин къайда ишлемишна, хуьруьн майишатдин 29 машин, гьа гьисабдай яз 23 трактор (67,3 миллион манатдин, алатай йисан и вахтунин делилрив гекъигайла, — 131 процент) маса къачунва.
«Лезги газет»
