Государстводин ва жемиятдин деятель, карчи, меценат Мамед Абасова дяведин махсус серенжемда телеф хьайи мегьарамдхуьруьнви викIегь аскер Самед Гьасинханован диде Зумриятал кьил чIугуна.
38 йисан яшдавай наводчик-минометчик Самеда Херсондин областда, Донецкдин Республикада миллетбазрихъ галаз кьиле фейи хейлин женгера иштиракна. 2025-йисан сентябрдиз, Малиновка хуьр душмандикай азаддайла, ам телеф хьана.
И туькьуьл дуьшуьш жедалди вилик Самед отпускдиз хизандин патав хтанвай, дидедин, стхайрин ва вахарин арада шад, бахтлу йикъар акъуднай. Санал кIелайбурун патав фенай, абурухъ галаз жаван, жегьил вахтар рикIел хканай.
Вири хъсан тир, анжах кIвал хъвадай михьи цикай магьрум тир. КIвализ кьван турба гъидай мумкинвал авачир. Отпускдин вахтни куьтягь хьана. Мад отпускдиз хтайла, цин месэла гьялдай фикир аваз, ам СВО-диз хъфена. Гьайиф хьи, душмандин гуьлледи аскердин мурадар пучна.
Гьасинхановрин хизандин дерди-гьалдикай М. Абасоваз хабар хьана ва ам куьмек гунин къайгъуйрик экечIна. Вичин куьмекчийрал водопровод тухун патал вуч герек ятIа ва гьихьтин кIвалахар авун лазим ятIа чирун тапшурмишна.
– Самед Гьасинханова уьлкведин итижар, чи гележег, кIвал-югъ, инсанар хуьн патал вичин чан къурбандна. Ам ва дяведин махсус серенжемда телеф хьайи вири чна рикIера хуьда. Чи буржи адан хизандиз герек куьмек гун я. Са рахунни алач, игитдин хизан чна хъвадай михьи целди таъминарда, – лагьана Мамед Абасова.
Абад Азадов
