Са йис инлай вилик Яран суварин йифиз ахлакьсузри магьир устад, чIехи арифдар Сулейман бубадин кIвализ — музейдиз цIай янай. Ихьтин кар авурбурухъ я Аллагь, я дин, я диде-буба, стха-вах, мукьва-кьили, хизан, аял-куял, келледа мефт авайбур туш.

Сулейман буба туьхуьриз тежер чирагъ я. Зурба революционерар, игит рухваяр, машгьур­ алимар, гафунин устадар, сеняткарар, музыкантар, “Лезгинка” хьтин ансамбль ганвай савадлу зи играми лезги халкь, ша чна вирида, сад хьана, чун къекъвезвай рекьера авай цацар, къалгъанар, чIуру ниятрин угърашар терг ийин.

Заз “Лезги газетдин” чинилай Сулейман бубадин тIварунихъ галай райондин администрациядиз, гьуьрметлу Нариман Абдулмуталибоваз, чIехи шаирдин музей арадал хкуник лайихлу пай кутунвай, чпин къуватар желбнавай вирибуруз сагърай лугьуз кIанзава. Къуй а жумартлу инсанриз Аллагь вич куьмек, лезгийрихъ ахьтин кьегьал рухваяр мадни пара хьурай.

Шихали  Багъиров