СтIал Сулейманан район госпрограммаяр ва чкадин проектар уьмуьрдиз кечирмишунай республикада вилик жергейра авай муниципалитетрик акатзава. И йикъарани районда, «Чкайрилай теклифар» проектдин сергьятра аваз яшайишдин метлеб авай цIийи са шумуд объект шад гьалара ачухна. И мярекатра райондин кьил Саид Темирханова, адан заместитель Лацис Оружева, хуьрерин администрацийрин кьилери иштиракна.
Эминхуьре цIийикIа туькIуьр хъувурдалай гуьгъуьниз яшайишдин метлеб авай гзаф везифайрин центр ачухна. ЦIийи хъувунвай дараматда хуьруьн поселенидин администрация, культурадин кIвал, библиотека, амбулатория ва маса идараяр ава. Бязи кIвалер алишверишдин метлеб ва арендада вуганва.
Яру лент атIайдалай гуьгъуьниз Эминхуьруьн агьалийриз яшайишдин метлеб авай алай аямдин центр ачухун Саид Темирханова мубаракна.
«Эхиримжи йисара районда яшайишдин метлеб авай гзаф объектар ишлемишиз вахкана. Чи виридан куьмекдалди къе Эминхуьре ихьтин объект арадал гъанва. Заз республикадин кьиле авайбуруз, гьелбетда, меценатриз яшайишдин метлебдин проект уьмуьрдиз кечирмишуник пай кутур Нагъиеврин хизандиз чухсагъул лугьуз кIанзава. Зун кIевелай инанмиш я хьи, санал кIвалахунин хъсан адетар чна къенлай кьулухъни давамарда. ИкI, республикадин руководстводин куьмекни галаз чна мукьвал гележегда Эминхуьре аялрин бахча эцигун пландик кутунва. «Сардархуьр-ДаркIуш-Къазмаяр» цин турба ишлемишиз вахкайла хуьре хъвадай целди таъминарунин кIвалахни къайдадик акатда», — лагьана ада.
Проектдин сергьятра аваз и йикъара Цмурдал гъвечIи багъни (сквер) ачухна. Мярекатда школьникри, Саид Темирханова, меценат Марат Шайдаева ва Цмуррин администрациядин кьил Раида Алибеговади иштиракна.
Лишанлу вакъиа цмурвийриз Саид Темирханова мубаракна.
«Алай вахтунда райондин мулкунал образованидин объектар эцигунин ва ремонт хъувунин кIвалахар давамарзава, рекьер ва куьчеяр ремонтзава, паркарин зулар ва гъвечIи багълар дуьзмишзава, хейлин маса кIвалахар кьиле тухузва. КьетIен гъвечIи багъ къе чна Цмурдални ачухзава. И шад вакъиадай за гьуьрметлу меценат Марат Шайдаеваз чухсагъул лугьузва. Ада активнидаказ иштиракун себеб яз, Цмурдал яшайишдин метлеб авай алай аямдин объектар, гьабурукай яз инновациядин школа, культурадин ва сагъламвал хъсанардай объектар эцигиз, алава образованидин центр ачухиз, цIийи дараматрин комплекс эцигун патал проектар гьазуриз алакьна. Чи планрик Цмурдал аялрин бахча эцигунни ква», — лагьана Саид Темирханова.
Хуьруьнвийриз тебрикдин келимаяр мергьяматлувилин «Хуьр» фондунин учредитель Марат Шайдаевани лагьана.
Яшайишдин проектрин сергьятра аваз Хтундал ва Зугьрабахуьре хъсандиз дуьзмишнавай гъвечIи багълар (скверар) ачухна. Хтундал гуьзел акунар алай чкадал дуьзмишнавай майдан 425 квадратный метрдиз, Зугьрабахуьре 201 квадратный метрдиз барабар я. И проектриз алава пулунин такьатар гунин карда Ханбалаеврин ва Керимоврин хизанрини иштиракна.
Хтундал ва Зугьрабахуьре кьиле фейи шадвилин мярекатра Лацис Оружева, Общественный палатадин председатель Алимет Мейланова, Шихидхуьруьн ва Агъа СтIалрин хуьрерин администрацийрин кьилер тир Шамил Ханбалаева ва Надир Эфендиева иштиракна.
Хазран Кьасумов
