Санкт-Петербургда машгьур духтур

Бубайрин мисалда лугьузвайвал, кьисметдихъай катиз жедач. Гьакъикъатдани­, кьисметди инсан, гару ягъай пеш хьиз, акъуд тийидай чка жедач. Гьа и кар себеб яз, лезги халкьдин векилар Россия­дин­ жуьреба-жуьре субъектра, гьатта къе­цепатан уьлквейрани яшамиш жезва, кIва­лахзава, илимдал, спортдал машгъул жезва. Абурукай гзафбуру чпин къилихдалди, ахлакьдалди, хуш рафтарвилелди ва хиве авай везифаяр намуслудаказ кьилиз акъу­дуналди, гъурбатдани халкьдин патай­ гьуьрмет, кIанивал ва разивал къазанмиш­зава. Ихьтин кьегьал рухвайрикай сад Санкт­-Петербург шегьерда духтурвиле кIва­­­лахзавай медицинадин илимрин кандидат Шайдаев Эльбрус Замирович я.

Курхуьруьн, Санкт-Петербургдин тIва­рар ва Шайдаеврин фамилия кьунмазди, чи фикирдиз кеферпатан меркезда яшамиш жезвай курхуьруьнви, меценат Шайдаев Зураб Турабовичан тIвар къведа. Чаз и макъалада вичикай куьрелди суьгьбет ийиз кIанзавай Эльбрус гьа жумарт хва, «Коломяги-ретро» ЗАО-дин гендиректорвиле кIвалахзавай Зураб Турабовичан стха Замиран гада я.

Эльбрус Шайдаев Курхуьрел гьуьр­метлу ва низамлу хизанда дидедиз хьана. 1998-йисуз хуьруьн юкьван школа лап хъсан къиметар аваз акьалтIарай жегьил Дагъустандин медакадемиядик экечIна. Ина кIелдай йисара ам чешнелу студент­рин жергеда хьана. Эльбруса медицинадин хилен вузрин студентрин ва жегьил алимрин конференцийра ва маса мярекатра са шумудра иштиракна. Ада лап хъсан къиметар, чирвилер аваз медици­надин академия, гуьгъуьнлай Санкт-Пе­тербургдин Г.А. Альбрехтан тIварцIихъ галай НЦЭПР-дин (научно-практический центр медико-социальной экспертизы, про­тезирования и реабилитации инвалидов) клиникадин ординатура ва «Травматология и ортопедия» пешедай аспирантура акьалтIарна.

2004-йисалай инихъ Эльбрус Шайдаева Россиядин зегьметдин ва яшайишдин рекьяй хуьнин министерстводин Г.А. Альбрехтан тIварцIихъ галай ФНЦРИ-да кьилин категориядин духтур, травматолог-ор­топед яз кIвалахзава. Ам дерин чирви­лер авай, везифаяр намуслудаказ кьилиз акъудзавай пешекар тирвилин гьакъиндай интернетдин сайтра адакай куьмек хьайи хейлин ксари кхьенвай келимайри шагьидвалзава. Гьакъикъатдани, Санкт-Петербургда Ленинграддин областда ва маса чкайрани адаз гьуьрмет ава.

Чи ватанэгьлиди мукьвал-мукьвал конференцийра иштиракзава, пешекарвилин дережа хкажзава. Кьилди къа­чур­тIа, 2008-йисуз «Лечение врожденной­ косолапости по методу Понсети у де­тей» темадай международный конференция­дал мастер-класс къалурна; 2014-йисуз­ «Лечение врожденной косолапости и врож­денного вертикального тарана у детей» темадай международный конференцияда иштиракна.

2011-йисуз — Ботулинотерапиядай сер­­тификациядин курс, 2016 ва 2019-йисара­ — ботулинотерапиядай пешекардин­ серти­фикат, 2011, 2016 ва 2020-йисара­ — Санкт-Петербургда СПбИУВЭК-да­ трав­ма­­­­то­ло­гиядай ва ортопедиядай сер­тифи­­ка­ция­дин цикл, травматолог-ор­то­педдин­ серти­фикат, 2012-йисуз академик Г.А. Или­­за­ро­ван тIварцIихъ галай травматологиядин ва ортопедиядин НМИЦ-да «Чрес­костный остеосинтез в травматологии и ортопедии» пешекарвилин дережа хкаждай сертификациядин курс тестикьарна.

Эльбрус Замировича 2011-йисуз «Трав­матология и ортопедия» пешедай медицинадин илимрин кандидатвилин тIвар къачун патал «Медицинские аспекты абилитации пациентов с врожденной­ сгибательной контрактурой локтевого сустава» темадай диссертация хвена, алимвилин тIвар къачуна.

Ам хьанвай агалкьунрал рази хьана акъвазнавач. Алай вахтунда ам «Травматология и ортопедия» пешекарвилин рекьяй медицинадин илимрин докторвилин тIвар къачун патал «Медицинская абили­тация инвалидов с продольной эктромелией нижних конечностей» темадай илимдин кIвалах кхьинал машгъул я.

Эльбрус Шайдаев 3 патентдин, илимдин 25-далай виниз макъалайрин (абурукай 8 къецепатан уьлквейрин изданийриз акъатнава) автор я. Эльбрус Замировича медицинадин илимрин докторвилин тIвар къачун, адахъ мягькем сагъламвал ва кIвалахда мадни еке агалкьунар хьун чи мурад я.

Хазран  Кьасумов