И йикъара Орёл шегьерда кьулан тарцихъни кIвачерихъ галаз алакъалу азарар авай (ПОДА) спортсменрин арада армрестлингдай Россиядин чемпионат ва кIвенкIвечивал патал акъажунар кьиле фена. Ана уьлкведин 34 региондай тир 180-дав агакьна пагьливанри чпин гъилерин къуватар алцумна. Инанмишвилелди кьиле тухвай акъажунрин нетижада Россиядин чемпионвилин тIварариз лайихлу хьайибурун арада чи миллетдин кьве векил — Рудин Селимхановни Насир Халикьов ава.
КьетIендаказ къейд авуниз лайихлу кар мадни ам я хьи, спортдин и жуьреда Рудин Селимханова (адан ери-бине Хасавюрт райондин Къурушдилай я) Россиядин чемпионвилин тIвар гила 10-сеферда къазанмишнава. Ам дуьньядин ва Европадин чемпионатрин гъалибчини я. Алатай йисан эхирра Болгарияда армрестлингдай кьиле фейи дуьньядин чемпионатда ада буьруьнждин медаль къазанмишнай (дагъустанвийрикай ана иштиракай ва кIвенкIвечи чкаяр къазанмишай пуд спортсменни чи миллетдин векилар тир).
Вичин ери-бине Кьурагь райондай тир Насир Халикьовни армрестлингдай чIехи пагьливан я: ада са шумудра Россиядин чемпионвилин, кьве сеферда дуьньядин чемпионвилин тIварарни къазанмишна. Нубатдин чемпионатда ада 110 кг-дин заланвал авайбурун арада гьам эрчIи ва гьамни чапла гъилин къуватар алцумна, кьве жуьредайни инанмишвилелди гъалибвилер къазанмишна.
РикIел хкин: 2015-йисуз Насир Халикьован чандиз къаст ийиз алахъуникди ам кIвачикай магьрум хьанай. Амма, бедендиз хьиз, руьгьдизни мягькем пагьливанди спорт гадарнач. Бедендин мумкинвилер сергьятламиш хьанвай спортсменрин арада иштиракунин къарар кьабулай адалай, аквазвайвал, агалкьунарни къазанмишиз алакьзава.
Халикьоврикай гаф кватай чкадал мадни лугьуз кIанзава хьи, Насиран стха Назирахъни армрестлингдай еке агалкьунар ава. Имийрилай чешне къачуна, абурун стхадин хва Мегьамедвели Халикьовни гъвечIи чIавалай армрестлингдал машгъул жезва. Къенин юкъуз ам спортдин и жуьредай 11 сеферда Дагъустандин чемпион, кьве сеферда Россиядин чемпион, армрестлингдай спортдин мастер, жуьреба-жуьре турниррин ва акъажунрин гъалибчи ва призер я. Кьилди къачуртIа, алатай йисуз Дондал алай Ростовда СВО-дин иштиракчийрин арада армрестлингдай кьиле тухвай акъажунрани ада 1-чка кьуна.
Рагнеда Рамалданова
