Даурен Куругълиев и йикъара Махачкъаладин аэропортуна багърийри, ярар-дустари шад гьалара къаршиламишна.
Газетдин виликан нумрада чна Словакиядин меркез Братиславада азаддаказ кьуршахар кьунай Европадин чемпионатда 92 кг-дал къведалди заланвал авайбурун арада чи ватанэгьли, Грециядин патай экъечIзавай Даурен Куругълиев финалдиз акъатнавайдакай хабар ганай.
ИкI, О. Нурмегьамедовахъ галаз бягьсина ада, инанмишвилелди гъалибвал къазанмишуналди, чун мад сеферда шадарна. РикIел хкин: гила ам Европадин чемпионвилин тIварцIиз галаз-галаз 3 сеферда лайихлу хьанва. Вири санлай Европада кьиле фейи акъажунра Д. Куругълиева къизилдин 5 медаль къазанмишнава. Европадин чемпионатра — 2017, 2023, 2024, 2025-йисара, 2019-йисузни — Европадин къугъунра. Ам 2024-йисан Олимпиададин къугъунрин призёр, Россиядин чемпион (2018, 2020-йисар), Россиядин международный классдин спортдин мастер я.
Европадин чемпионат башламишиз 2 варз амаз, чи ватанэгьлидин мет (мениск) операция авунвай. Тренерри адаз гьасиррал экъечI тавунин патахъай лугьузвайтIани, Даурена нубатдин сеферда вичин руьгьдинни бедендин лигимвал ахтармишунин кьетIнавай. Нетижади чи халкьдин тIвар мадни гьуьндуьр дережадиз акъудна. Аферин, баркалла!
Чаз мадни чир хьайивал, Дауренахъ виридалайни «кьилин» болельщик ава. Амни адан гъалибвал кIусни шаклувилик кутан тийизвай чIехи буба я. Гьаниз килигна, чна Дауреназ — Европадин чемпионвилин тIвар, адан чIехи бубадизни хтулдин нубатдин агалкьун тебрикзава. ГьакIни чаз агъсакъалдиз и мукьвара къейддай 9-Майдин — Ватандин ЧIехи дяведа Гъалибвал къазанмишна 80 йис тамам хьунин суварни тебрикзава, адахъ чандин мягькем сагъвал ва гележегда хтулдикай Олимпиададин «къизилдин» чемпион хьунни алхишзава.
Рагнеда Рамалданова
