РД-дин рекъемрин рекьяй вилик финин министерстводи республикадин милли чIаларал акъатзавай газетар патал «Чан алай газет» проект арадал гъанва. Адан кьетIенвал квекай ибарат я?

Якъин кар я, вири мярекатрикай, крарикай, гьерекатрикай газетдиз акъудун патал чIехи макъалаяр кхьиз жедач. «Чан алай газет» проектдин куьмекдалди, тайин са мярекатдикай газетда куьруьдаказ ганвай макъалада авай малуматрилай алава малуматар чириз жеда. И кар кьилиз акъудун патал телефонда «SilikaAR» приложение кардик кутуна кIанзава. Ахпа и приложение ачухна, телефондин камера газетда авай макъаладихъ галай шикилдал гъизва ва куь телефонда макъалада ихтилат физвай вакъиадиз талукь видео акатзава, яни приложенидин куьмекдалди шикил видеодиз элкъвезва.

Къейд ийин хьи, газетда чапнавай вири шикилрай видеояр акатзавач. Гьи макъаладихъ видеодиз элкъвезвай шикил галатIа, гьа макъаладин эхирда видеодин махсус лишан жеда. Адан куьмекдалди кIелзавайбурувай видеодиз элкъвезвай шикил гьим ятIа тайинариз жеда.

И нумрада чапнавай «Лекьрен муг» этнолагерь» макъаладихъ галай шикилдин куьмекдалди («SilicaAR» приложение кутаз рикIелай алудмир) квевай этнолагердикай гьазурнавай видеодиз килигиз жеда.

«Лезги газет»