15-июлдиз Дагъустандиз Беларусь Республикадай делегация мугьман хьана. «Лезги газетдиз» РД-дин Гьукуматдин пресс-къуллугъди хабар гайивал, мугьманар меркездин аэропортуна вице-премьер Ризван Гъазимегьамедова, РД-дин экономикадин ва мулкар вилик тухунин рекьяй министр Гьажи Султанова, Россиядин къецепатан крарин министерстводин Дагъустанда авай векил Марат Османова ва масабуру кьабулна.
Белоруссиядин делегациядиз «Белкоопсоюз» карханадин председатель Инесса Короткевича регьбервал гузва. Мугьман хьунин кьилин макьсад Дагъустандихъ галаз амадагвилин алакъаяр мягькемарун, ина инвестицийрин рекьяй авай мумкинвилер чирун ва санал кIвалахдай рекьер тайинарун я. 16-июлдиз Махачкъалада мугьманрихъ галаз РД-дин Гьукуматдин Председатель А. Абдулмуслимова гуьруьш кьиле тухвана. Мугьманар тебрикдайла, ада Дагъустандинни Белоруссиядин арада акьалтIай дуствилин алакъаяр авайди къейдна. Сифте яз Дагъустандин делегация Белоруссиядиз Расул Гьамзатован 100 йисан юбилей къейд авур 2023-йисуз фенай, кьвед лагьай сеферда — 2025-йисан февралдиз.
«Лезги газет»
