Ватандин ЧIехи дяведин йисар неинки Яру Армия, гьакI советрин вири халкьар патални лап четинбур, гзаф азиятринбур, дарвилеринбур хьана. Далу патан баркаллу зегьметди, фронтдиз вири йисара умудлудаказ куьмек гуни фашистар дарбадагъ ийидай мумкинвал яратмишна. Дяведин ветеранрин, далу патан зегьметчийрин гекъигиз тежедай игитвилиз гьуьрмет авун яз, Россиядин Президент Владимир Путинан указдалди «1941-1945-йисарин Ватандин ЧIехи дяведа къазанмишай Гъалибвилин 80 йис» медаль тайинарна. Ам республикадин чан аламай фронтовикриз, далу пата жуьреба-жуьре хилера гьакъисагъвилелди зегьмет чIугур ветеранриз гузва.
Мегьрамдхуьруьн райондин администрациядин кьил Фарид Агьмедова райондин далу патан зегьметчияр тир нубатдин 13 касдив Гъалибвилин медалар вахкана ва вичин патай пулдин пишкешарни гана. Ингье абур: Умаров Аким Рустамович (Хожа-Къазмаяр), Лавхаев Ядигар Техлимович (ЦIийи Филер), Исаев Камалдин Гьажиевич (КьепIир-Къазмаяр), Уружева Жегьверат Агъалиевна (Чахчар-Къазмаяр), Велиева Пиче Салмановна (Тагьирхуьруьн-Къазмаяр), Камалова Бажикъиз Алимерденовна (Самур), Ханова Афисат Гьажибабаевна (Билбил-Къазмаяр), Самедов Самед Агьмедович (Приморский), Жаватов Мурсал Исаевич (Оружба), Кахирова Саният Шихбалаевна ( Ярукьвалар), Мирзебалаева Назлу Кезимовна (Советское), Разаханова Жирият Гьамидовна (ЦIелегуьн), Пулатов Дашдемир Пулатович (ЦIелегуьн).
— Куьне, гьуьрметлу районэгьлияр, чи майишатра, карханайра, идарайра вири йисара гакъисагъвилелди зегьмет чIугуна. Чун квелай пара рази я. Квехъ инлай кьулухъни чандин сагъвал ва яргъи уьмуьр хьун чи мурад я, — лагьана Ф. Агьмедова.
* * *
Дяведин ва зегьметдин ветеранрив Гъалибвилин 80 йисан медалар вахкуниз талукьарнавай мярекатар Кьурагь райондани кьиле фена. Райондин администрациядай хабар гайивал, Гъалибвилин сувар алукьдалди ихьтин медалар далу патан зегьметчияр тир 17 касдив вахкуда. И важиблу везифа тамамарунал райондин администрациядин хуьрерин администрацийрихъ галаз кIвалах тухунин рекьяй муниципалитетдин кьилин векил Эльмира Исаева машгъул я.
Абад Азадов
