Чаз кхьизва
ЧIехи Советрин уьлкведа дегишвилер физвай девирра жуьреба-жуьре тIварар алаз тешкилай ва чапдай акъатай лезги халкьдин милли газет дагъвийрин яшайишдинни руьгьдин жанлу такьат хьана.
Газет акъатиз 100-йис жезва, им лишанлу юбилей я. И девирда газетди махлукьатдик ватанпересвилин, ислягьвилин, аслу туширвилин руьгь кутуна, вилик акъвазнавай макьсад кьилиз акъудуниз майилвална, гьар са кар зарбачивилелди кьилиз акъудуниз эвер гуз хьана, цIийи эцигунрал гьар са кас желбна. Нетижада зегьметда агалкьунар къазанмишна, инсанрин савадлувал хкажна, жемятдин гьал-агьвал хъсанарна, уьлкве гьуьндуьр дережадиз хкажна. Газетди эвелдай кьил кутур важиблу месэлаяр алай вахтундани баркалла алаз гьялун давамарзава. Гьар са ватандашдиз уьлкведин тарихдин гьар са югъ чир хьун лазим я. Газетдин коллективди обществода марифатлувилин, ватанпересвилин, савадлувилинни меденивилин ивирар тестикьарзава, ам инсанрин къанажагълувал, жавабдарвал хкажиз гьавалат хьанва. ЧIал хуьниз, вилик тухуниз кьилин фикир гузва. Тарихдин месэлаяр кIватIун, чапдай акъудун, кIелзавайбурун къатарив агакьарун важиблу месэла я.
И месэлаяр гьялуник газетдин литотделдин редактор, шаир, журналист Мердали Жалилова еке пай кутазва. Ада и месэлаяр алай вахтунда, алатай девиррин газетар тупIалай ийиз, галай-галайвал кIелзавайбуруз раиж хъийизва, несилрин алакъаяр хуьзва, инсанриз четинвилерай экъечIдай уламар чирзава, ерилу дережайриз хкаж жедай рекьер къалурзава. Сагърай вич!
Газетдин коллективди кьилиз акъудзавай важиблу кIвалахда цIийи-цIийи агалкьунар хьун гуьзлемишзава.
Ишреф Жаватов,
Къалажух
