Россиядин Федерациядин УФСИН-дин Дагъустандин УИС-дин  идарада ветеранрин йикъаз талукьарнавай мярекат шад гьалара кьиле фена. Ана УФСИН-дин къурулушдик акатзавай къуллугъчийри, УИС-дин ветеранри, силисдин комитетдик акатзавай ветеранрин тешкилатрин председателри, МЧС-дин, Муфтиятдин векилри ва масабуру ишти­ракна.

Уголовно-исполнительный  къурулушда къайда-низам таъми­нарунин муракаб ва жавабдар къуллугъдиз чпин уьмуьр бахшнавайбур рикIел хкун, абуруз гьуьр­мет авун патал тайинарнавай югъ кьетIенди я. Суварин йикъан­ сергьятра аваз управленидин чIехи­бур ветеранрихъ галаз гуьруьш­миш хьана, идарада цIуд йисаралди зегьмет чIугурбуруз баркалла лагьана ва ветеранриз ­шабагьар, къиметлу пишкешар гана.

— Къе чна чпин уьмуьр эхиримжи нефесдалди Ватандиз къуллугъ авуниз гайибур рикIел хкизва, чахъ галамай юлдашриз баркалла лугьузва. Куь камаллувал, тежриба чун патал зурба чешне я, — къейдна Россиядин УФСИН-дин, РД-дин УИС-дин начальникдин сад лагьай заместитель, полковник Расим Мегьтиева.

Дагъустан Республикадин  УИС-дин ветеранрин жемиятдин тешкилатдин председателдин заместитель, полковник Камил Абдулаева алай вахтунда зегьмет чIугвазвайбуру УИС-дин кIвалах хъсанаруник, вилик тухуник кье­тIен пай кутазвайди къейдна.

— Куьне ийизвай гьар йикъан­ кIвалахдиз баркалла къвезва. Жегьилриз ватанпересвилин тербия­ гунин, къуллугъдин адетар мягькемарунин карда квехъ агалкьунар жезва. Чун, ветеранарни, ри­кIелай алуд тавунай, чи тежрибадикай, камалдикай менфят къачунай куьн сагърай. Ветеранар гьамиша чпин чирвилер, тежриба жегьилриз гуз гьазур я, — лагьана Камил Абдулаева.

Мярекатдин иштиракчийри­ рагьметдиз фейи юл­да­шар, са декьикьада кисуналди­, рикIел хкана. Ветеранри УИС-дин жегьил къуллугъчийриз чпин кIва­лахдикай, тежрибадикай суьгь­бет­на, къуллугъдин кьетIен ва­къиаяр рикIел хкана.

Дагъустандин эстрададин музыкантри, манидарри мярекатдин иштиракчийриз рикIел аламукьдай концерт гана.

Абад Азадов