Гьар са хуьруьхъ, гьар са миллетдихъ вичин баркаллу рухваяр ва рушар ава. Заз инал чи лезги чилин дамах, эдебиятдин дестек, Дагъустандин халкьдин шаир, муаллим Сажидин Саидгьасановакай ихтилат ийиз кIанзава.
Чав, Ярагъ-Къазмайрин хуьруьн агьалийрив, шад хабар агакьна. Сажидин Саидгьасанова, яргъал йисара зегьмет чIугуна, «Ярагъви ашукь Уьзден» ктаб печатдай акъуднава. ТIвар-ван авай шаир и ктабда гьикаятчи яз майдандиз экъечIзава. Ана тарихдин чинар, ашукьдин девирда чи халкьдин яшайиш гьихьтинди хьанатIа, халкьдин руьгьдин гьуьндуьрар гьихьтинбуря тиртIа ва алай аямда гьихьтинбур хьун лазим ятIа къалурзава.
И ктабдикай чавай, дидед чIалан тарсар гузвай муаллимривай, XIX асирдин литературадикай малуматар гудайла, менфят къачуз жеда. Ктабда ашукьдин уьмуьрдикай таниш тушир делилар, жуьреба-жуьре баянар, мисалар, манияр, шиирар ва келимаяр ганва.
Ктаб кIелайла, дидедиз хьайидалай инихъ Уьзденан вири уьмуьр ачух жезва, адан муьгьуьббатдин манийри гьейранарзава, шиирри хайи Ватан кIан хьуниз эвер гузва. Заз ашукь Уьзденан эсеррикай садалди куьтягьиз кIанзава.
Бакуда бес давамда гьикI,
Чан хайи Ватан Ярагъар?
Вахъ цIигел яз акъатна рикI,
Чандилай масан Ярагъар!
Нефес къачур экуьн гьава
Чандиз ажеб тушни дава?
ЗатIни авач валай багьа,
Женнетдин ватан Ярагъар!
Вахъ ажайиб тегьер ава,
Пуд пата ви nlupep ава.
Эфендияр, шейхер ава,
Алимрин макан Ярагъар!
Магьият Жаруллаева,
Мегьарамдхуьруьн райондин Ярагъ-Къазмайрин
школадин дидед чIалан ва эдебиятдин муаллим,
РФ-дин лайихлу муаллим
