1-июндиз, Аялар хуьдай международный юкъуз, шад мярекатар Дагъустандин меркезда гьар йисуз са шумуд майдандал кьиле тухузва. ИкI, цIи абур флешмобдилай башламишна: Р. Гьамзатован проспектда, М. Горькийдин тIварунихъ галай Урусрин драмтеатрдин вилик гурарра акъвазна, милли пек-партал алай, гъилера пайдахарни шарар авай аялрин коллективри тамашачияр шадвилелди къаршиламишна. Аялриз ва абурун диде-бубайриз сувар тебрик авурбурун арада Дагъустандин культурадин министрдин заместитель, РДНТ-дин директор Марита Мугьадова, Дагъустандин дишегьлийрин союздин председатель, Ватандин аскеррин хизанрин комитетдин регьбер Интизар Мамутаева, писатель Раисат Ибрагьимова, республикадин музыкантрин союздин правленидин председатель, Дагъустандин халкьдин артист Хан Баширов ва масабур авай.
Сувар тебрикдайла, абуру къенин юкъуз республикада жаван дагъустанвияр тамамдаказ вилик фин патал шартIар тешкилунихъ элкъуьрнавай еке кIвалах кьиле тухузвайди, аялрин бахчаяр, мектебар, спортдин ва медениятдин объектар эцигзавайди къейдна. «И сувари чаз аялар чахъ авай виридалайни зурба девлет тирди къалурзава», — лагьана М. Мугьадовади.
Республикадин аялрин художественный яратмишунрин «ГъвечIи дагъвияр» фестивални яргъалди рикIел аламукьдайди хьана. ИкI, винидихъ тIвар кьунвай майдандал Дагъларин уьлкведин шегьеррайни районрай тир бажарагълу жаванри ислягьвиликай, дуствиликай, муьгьуьббатдикай манияр лагьана, туьнт кьуьлер тамамарна, художественный рекьяй мастер-классар къалурна. Урусрин драмтеатрдин къаншарда М.А. Жемалан тIварунихъ галай Дагъустандин художественный училищедин студентрин иштираквал аваз тешкилнавай арт-майдандал инсанар иллаки гзаф кIватI хьанвай. ГьикI хьи, инал абурувай неинки художникрин кIвалахдиз тамашиз жезвай, гьакIни хушвал авайбурухъ чпин портрет чIугваз тадай мумкинвал авай, хсуси портрет абуруз пишкеш яз гузвай.
И юкъуз кIватI хьанвайбурун гуьгьуьлар Дагъустандин Огни шегьердай атанвай пагьливанри мадни шадарна. Халкьдин музыкадин алатрин ансамблри тамамарай манийри сувариз кьетIен ранг яна, Дагъларин уьлкведин музыкадин девлетлу адетар рикIел хкана.
Мярекатрин вири иштиракчийриз Дагъустандин культурадин министерстводин патай дипломар гана.
Рагнеда Рамалданова
