Хийирлу крар кьилиз акъуд­завай «ЛЕКИ» фондуни 15- февралдиз Дербент шегьерда, СтIал Сулейманан тIвар­цIихъ галай лезгийрин госмуздрамтеатрдин чIехи зал­да,­ лезги чIалаз таржума авун­вай «КьатIма Нер» («Карлик Нос») мультфильмдиз аялар килигунин мярекат тешкилна.

Залда вишелай гзаф аялар­, абурун диде-бубаяр, чIехи буба­яр, бадеяр кIватI хьанвай. Фондунин векил, общественный деятель, мярекат тешкилу­нин тек­лиф гайи Садикь Гьасанова мультфильм кутадалди вилик, аялрихъни чIехибурухъ элкъве­на, хайи чIал аялрин арада маш­гьур авунин рекье сифте яз кьиле тухузвай мярекатдикай ихтилатна, Лезги театрдин кьиле авайбуруз ихьтин мярекат тешкилдай мумкинвал гунай сагърай лагьана.

Алай аямда жуван чIал хуьн важиблу ва хци месэлайрикай сад тирди общественный деятель Навои Бутаевани лагьана. «Лезги газетдин» кьилин редактордин заместитель Куругъли Ферзалиева «ЛЕКИ» фондунини газетдин редакцияди санал хайи чIал, халкьдин меденият ва эйнивал хуьн патал кьиле тухузвай олимпиадайрикай, конкурсрикай ва маса мярекатрикай ихтилатна.

Мультфильм саки са сятни зуран вахтунда давам хьана. Чаз акурвал, ам аялриз бегенмиш хьанвай.

Мярекат аялриз хайи чIала­кай, медениятдикай, эдебиятдикай суалар гунин викторина кьиле тухуналди давам хьана. Лезги чIалан онлайн-тарсар кьиле тухузвай муаллим Рашид Гьамидова ва К.Ферзалиева «Леки» фондунин векил Р. Мегьдиханова гьазурай суалар аялриз гана. Дуьз жавабар гайи аялриз фондунин патай ктабар («Лезги чIал чирин» ва «Лезги чIаланни урус чIалан шикилар галай гафарган») пишкешна.

Къейд ийин, аялриз хъсан насигьатар гунин жигьетдай маналу цIудралди мультфильмаяр тIвар кьунвай фондунин векил Руслан Мегьдиханован регьбер­вилик кваз таржума авунва. Текстер таржума ийидайбур, ванер кхьидайбур, монтажерар ва маса ксар желб авуналди, фондуни лезги чIалаз элкъуьрнавай мультфильмайриз интернетдин майданра агъзурралди лезгияр килигнава, абур гьакIни районрин телевиденийрай, аялрин бахчайра чIехи экранрилай къалурзава. Проект кьилиз акъудунин макьсад аялриз хайи чIал кIанарун я.

С. Салимов