И йикъара КIварчагърин хуьруьн культурадин кIвале, машгьур композитор, РФ-дин соцобеспеченидин лайихлу работник, журналистрин союздин член, медениятдин «Куьредин ярар» центрадин гьуьрметлу векил Маина Абдулмуталибовадин яратмишунриз талукьарна, «Куьредин авазрин булах» мярекат кьиле тухвана. Ана и дередин яратмишдай интеллигенциядин векилри, школадин муаллимри, кIелзавайбуру, хуьруьнвийри иштиракна.
Мярекат культурадин кIвалин директор Зейнулагь Наврузова ачухна ва кьилени тухвана.
Культурадин кIвалин общественный советдин член, муаллим Залбег Юзбегова, КIварчагърин юкьван школадин директордин тербиядин рекьяй заместитель Мадина Мегьамедовади ва Зейнулагь Наврузова Маина Абдулмуталибовадин уьмуьрдин ва яратмишунрин рекьерикай гегьенш рахунар авуна.
Маина Абдулмуталибова, гьевескар композитор яз, халкьдин арада фадлай машгьур я. Кьилди къачуртIа, бажарагълу композитор «Ша лагь зи ярдиз», «Дидедиз», «Садвал», «Рычал», «Чи уьмуьр», «Райондикай мани», «Лезги руш». «Шезва зун», «Бубадин веси» — санлай 130-далай виниз манийрин, «Зи рикIин авазар», «Авазрикай храй уьмуьр», «Милли культурадин са бязи месэлаяр» ктабрин автор я.
Тежрибалу музыкант Кьасум Ибрагьимов кьиле аваз, КIварчагъ дередин гьевескар музыкантрин дестеди Маина Абдулмуталибовади кхьенвай авазар тамамарна, школьникри манияр лагьана.
Хазран Кьасумов
