Дагъустанда энергетикадин хиле чирвал авай пешекаррин кьитвал екеди я. Идакай РД-дин энергетикадин ва тарифрин министр Марат Шихалиева 13-мартдиз «Дагъустан» РИА-дин майдандал республикадин СМИ-рин векилрихъ галаз хьайи гуьруьшдал хабар гана. Мярекатда гьакIни «Россетар Кеферпатан Кавказ» — «Дагэнерго» ПАО-дин филиалдин регьбердин везифаяр тамамарзавай Арсен Гьажиевани иштиракна.
Министрди гьисабзавайвал, энергетикадин хиле кадрийрин жигьетдай арадал атанвай кьитвили электросетрин комплекс патал кадрияр гьазурунин карда бинедилай дегишвилер тун истемишзава. И фикирдин тереф РД-дин Кьил Сергей Меликовани хуьзва. «Кадрийриз талукь «Дагъларин энергия» конкурс малумаруналди, чна арадал атанвай гьалар хъсан патахъ дегишарун патал еке кам къачузва, — лагьана М. Шихалиева. — Кадрийрин конкурсдин кьилин макьсад энергетикдин пешедин важиблувал хкажун ва и хилез къулай шартIара нетижалудаказ кIвалахиз гьазур тир вини дережадин пешекарар желб авун я».
Конкурс башламишнава. Ада Россиядин Федерациядин агьалияр ва чпин яш 18-йисалай 45 йисал кьван тир, вини дережадин образование авай ксаривай иштиракиз жеда. КьетIен фикир женгинин гьерекатрин ветеранриз ва дяведин махсус серенжемдин иштиракчийриз гуда — абуруз са кьадар кьезилвилер ава. Алай вахтунда конкурсда иштиракун патал арзаяр СВО-дин 6 иштиракчиди ганва.
Конкурсда иштиракун патал 2025-йисан 1-апрелдалди официальный сайта — энергиягор.рф.- авай онлайн-арза ацIурун лазим я. Конкурсдин гъалибчийриз дипломар, къиметлу пишкешар ва «Россетар Кеферпатан Кавказ» компанияда тежриба къачудай, «Дагэнерго» филиалда важиблу къуллугърал кIвалахдай мумкинвал гуда.
Арсен Гьажиева къейд авурвал, «Дагэнерго» филиалдин къуллугъчийризни и конкурсда иштиракдай ихтияр ава — идакай абуруз пешедин рекьяй виликди фидай алава себеб жеда.
Жасмина Саидова
