Мукьвара Дагъустандин Кьилин везифаяр вахтуналди тамамарзавай Владимир Васильева чи машгьур ватанэгьли, карчи ва меценат Жигерхан Сулеймановаз «Хайи чил кIан хьунай» гьуьрметдин знак гана.
Ахцегь райондин Луткунрин хуьряй тир, алай вахтунда Къазахстанда яшамиш жезвай Жигерхан Девлетханович гьакъикъатдани чIехи шабагьриз (награда) лайихлу инсан я. Эхиримжи йисара ада Ахцегь районда медицинадин «Самур» тIвар алай еке центр, спортдин комплекс, шадвилин мярекатар кьиле тухудай дарамат эцигна, Луткунрин жуьмя-мискIинда чимивал гудай къурулуш кардик кутуна. Актау шегьерда авай “Шадвал” ансамблдиз, Къазахстанда яшамиш жезвай чи ватанэгьлийризни куьмекар гузва. Гьар йисуз Луткунрин хуьре футболдай турнир (приздин фонд – 100 агъзур манат) кьиле тухузва. Ахцегь райондай тир спортсментри международный турнирра иштиракун патал пулдин такьатар чара ийизва. Гьар йисуз хуьруьнвийриз вичин патай суьрсет (гъуьр, шекер, дуьгуь) пайзава. Сив хуьнин сувариз дарда авай хизанриз садакьаяр гузва… И сиягь мадни давамариз жеда.
Мергьяматлувилер авунал машгъул жезвай хциз халкьдин патай еке гьуьрмет ава, гьар сада адан тIварцIихъ анжах хуш келимаяр лугьузва.
“Лезги газетдин” редакциядин коллективди чи кьегьал хва Жигерхан Сулеймановаз республикадин руководстводи ганвай шабагь рикIин сидкьидай мубаракзава. Лезги халкьдихъ хайи хуьрериз, жемятриз куьмекар гузвай баркаллу рухваяр мадни ава. Къуй куьн вири Аллагьди хуьрай!
«Лезги газет»
