16-июлдиз чи арадай алим Александр Абдулхакьович Аливердиев акъатна.

А.А. Аливердиев 1940-йисан 17-октябрдиз Моск­вада ахцегьвидин хизанда дидедиз хьана. Саратовда хъсан къиметар аваз военный училище акьалтIарна. Армиядин жергейра къуллугъай­далай кьулухъ ДГУ-да физикадин факультет (гьамни хъсан къиметар аваз) ва аспирантура куьтягьна. 1965-йисуз гвардиядин старший лейтенант Александр Аливердиев Ватандин ЧIехи дяведа Гъалибвал къачурдалай инихъ 20 йис тамам хьунин юбилейдин медалдиз лайихлу хьана.

1984-йисуз А. Аливердиева физикадинни математикадин илимрин кандидатвилин диссер­та­ция хвена. Илимдин чIехи къуллугъчи яз кIва­лахна. Физикадин факультетда ам вирибуруз къени дуст ва хъсан пешекар хьиз чидай. Гьеле студент тир йисарилай гатIунна, ада факультетдин жемиятдин уьмуьрда активнидаказ иштиракна.

Алимдин къелемдикай 70-далай виниз илимдин кIвалахар хкатнава. Абурун асул пай физикадин электроникадиз, гьа жигьетдай квантовый, плазмадин физикадиз талукь я. 1992-йисалай гатIунна пенсиядиз экъечIдалди, РФ-дин юстициядин министерстводин бинедал кардик квай Дагъустандин судэкспертизадин лабораторияда зегьмет чIугуна. Ина кIвалахзавайла, ада криминалистикадин техникадиз талукьарнавай илимдин макъалаяр чапдай акъудна. Ам зегьметдин ветеран тир.

Александр Абдулхакьовичан дустари, санал кIвалахай юлдашри и йикъара яс чIугвазва ва адан хизандиз, вири мукьва-кьилийриз башсагълугъвал гузва.