Мегьарамдхуьруьн райондин администрациядин пресс-къуллугъди хабар гайивал, мукьвара хизан, дидевал ва аялрин ихтиярар хуьнин рекьяй РД-дин Кьилин къвалав гвай уполномоченный Марина Ежова, Махачкъаладин администрациядин жегьилрин политикадин отделдин начальник Диана Агьмедова ва жегьилрин крарин, спортдинни туризмдин рекьяй комитетдин председателдин заместитель Карина Имранова Мегьарамдхуьруьн райондиз атана.  Абуру “Зун ва зи дустар” лишандик кваз сагъламсуз  аялринни жаванрин арада кьиле тухвай яратмишунрин  фестивалдин лап хъсанбур хкядай турда иштиракна. Гьа са вахтунда мугьманар  Мег­ьарамдхуьруьн райондин кьил Фарид Агьмедовахъ галаз гуьруьшмиш хьана ва администрациядин кьилин заместитель Гьабибулагь Мурадалиевахъ галаз Мегьарамдхуьруьн махсус школа-интернатдиз фена, аялрихъ ва коллективдихъ галаз та­ниш хьана. М.Ежовади начагъ аялрин яша­йишдин шартIариз, абур тербияламишунин къайдайриз фикир гана, абур ксузвай кIва­лер, столовой, библиотека ахтармишна.

“Зун ва зи дустар” лишандик кваз кьиле фейи фестиваль сагъламсуз, набут  аялар ва жаванар патал важиблуди тир. И мярекатди винидихъ тIвар кьунвай хьтин аялрихъ авай бажарагъ ачухуниз, абур чпин алакьунрихъ агъуниз куьмек,  чеб тек туширди гьиссдай мумкинвал гузва. Лагьа­на кIанда хьи, атанвайбур Мегьарамдхуьруьн махсус школадин аялрин  алакьунри гьейранарна.