25-августдиз Ахцегьа РД-дин медениятдин лайихлу деятель Жамал Шефиеван тIварцIихъ галай медениятдинни искусстводин музей цIийикIа туькIуьр хъувурдалай кьулухъ ачухуниз талукьарнавай мярекат кьиле фена. Гьа и юкъуз музейдин гьаятда, дагъвийрин аялар савадлу авунин кардик чIехи пай кутур урус муаллимрин экуь къамат эбеди авунин лишан яз, «Урус муаллимдиз» гуьмбетни ачухна.
Тарихдай малум тирвал, Дагъустанда светский сад лагьай мектеб Ахцегьа кардик акатнай. Акьалтзавай несилриз чирвилер гун патал иниз гзаф кьадар урус муаллимар атанай. Абурукай бязибуру чпин уьмуьр, кьисмет, гьамишалугъ яз, Дагъларин уьлкведихъ галаз алакъалу авуна. Урус муаллимри чIугур зегьмет рикIера хуьнин лишан яз, гуьмбет эцигун кутугай кар хьана.
Шад мярекатда Ахцегь райондин кьил Абдул-Керим Палчаева, «Урус муаллимдиз» монументдин автор, Дагъустандин халкьдин художник Шариф Шагьмарданова, Ахцегьрин музейдин директор Агьмед Дагъларова, Жамал Шефиеван хтул, цIийиз ачух хъувунвай музейдин директор Бедирнисе Саидовади ва масабуру иштиракна.
Мярекатдал рахайбуру урус муаллимри Дагъустандин образованидин хел вилик тухуник еке пай кутурди къейдна, абурун экуь къаматар рикIера хуьн дагъвийрин несилрин буржи тирдакай лагьана.
Чи мухбир
