Дяведин махсус серенжемдин игитар чи рикIера эбеди я! Арсен Агьмедханович Керимован тIварунихъ Ахцегьа куьче яна. Мярекат, адан уьмуьрдин рекьикай куьруь гаф рахуналди, райондин культурадин управленидин начальникдин заместитель Сулейман Сулейманова ачухна.
Донбассдин чилел миллетбазрихъ галаз женгер къизгъин хьанвайла, ватанпересвилин руьгьдаллаз тербия къачур жегьилдин рикIивай эхиз хьанач, хушуналди арза кхьена, ам Ватан хуьн патал гъиле яракь аваз душмандин хура акъвазна. Жуьрэтлувилин чешнеяр къалурзавай дагъви аскерди женгинин шабагьарни къазанмишна. Амма кьисметдикай садавайни хкечIиз жедач: барабар тушир къуватрин эхиримжи женгина ам телеф хьана. Дяведин тапшуругъ, жегьил чанни къурбандна, пакдиз кьилиз акъудай адан игитвал командованиди «Жуьрэтлувиляй» орден гуналди къейдна, гьайиф хьи, кьейидалай кьулухъ.
Игитдин тIвар эбеди авунин мярекат Ахцегь райондин кьиле авайбуру, РВК-дин, образованидинни культурадин идарайрин, жемиятдин тешкилатрин, чкадин СМИ-дин векилри, муьгьлетдиз хтанвай СВО-дин иштиракчийри, юнармейцийрини пионерри, Арсен Керимован мукьва-кьилийри иштиракна.
РФ-дин ва Дагъустан Республикадин гимнияр ягъайдалай кьулухъ райондин регьбер Абдул-Керим Палчаева лагьана: «Ватандин азадвални аслу туширвал, чи винел михьи цав хьун, несилрин хушбахт гележег патал чпин жегьил чанар гузвай СВО-дин игитрин вилик чун гьамиша буржлу я. Абурун чешнейралди чна акьалтзавай несил ватанпересвилин руьгьдаллаз тербияламишда. СВО-дин ветеранрин хизанриз, диде-бубайриз чна алакьдай вири жуьредин куьмекар гуда».
Митингдал гьакI Ахцегь, Рутул, Докъузпара районрин военный комиссар Аким Ибрагьимов, РД-дин «Память гор» общественный тешкилатдин Ахцегь райондин хилен председатель Абубакар Вагьабов, Ахцегьрин 1-нумрадин школадин муаллим, шаир Жамиля Саидова ва маса юлдашарни рахана. Абуру Арсенан уьмуьрдин куьруь ва жанлу рехъ рикIел хкана, адан багърийрин рикIериз сабур-теселли гудай келимаяр лагьана. Школьникри ватанпересвилин манадин шиирар кIелна. Игит аскер Арсен Керимован багърийрин патай адан хва Мегьамеда Ахцегь райондин кьил Абдул-Керим Палчаеваз, митингдин вири иштиракчийриз сагърай лагьана.
Куьчедин цлал Арсен Керимован тIвар алай кьул ачухна ва анал цуьквер эцигна. Игитдин экуь къамат эбеди рикIел хуьн яз, митингдин иштиракчияр са декьикьада кисна акъвазна. Мярекат рикIел аламукьдай шикилар ягъуналди акьалтIна.
Дашдемир Шерифалиев
