И йикъара Дербент райондин Агълабрин юкьван мектебда агрокласс ачухуниз талукьарнавай мярекат кьиле фена. Ана ДГАУ-дин ректор, профессор Зайдин Жамбулатова, РД-дин хуьруьн майишатдин ва суьрсетдин министрдин заместитель Шарип Шарипова, РД-дин образованидин министрдин заместитель Гьажимурад Мегьамедова, аграриядинни экономикадин техникумдин директор Жамалутдин Мегьамедова, ДГАУ-дин ректордин меслятчи Билал Омарова, деканар тир Ирина Мусаевади, Диана Мегьамедовади, проректор Феруза Цахуевади, Дербент райондин кьил Мавсум Рагьимова, «Каспий» КФХ-дин кьил Мегьамедзагьир Кьасумова ва масабуру иштиракна.
Мярекат гатIундалди, атанвай мугьманри школадин гьаятда СВО-да телеф хьайи хуьруьнвийриз эцигнавай обелискдив цуькверин кIунчIар эцигна.
Ахпа Агълабрин хуьруьн агьалийри, адет хьанвайвал, атанвай багьа мугьманар фуни кьел гваз къаршиламишна.
Сифте гаф Мавсум Рагьимов рахана. Хуьруьн агьалийриз ва школадин коллективдиз агрокласс ачухун мубарак авуналди, ада Агълабрин хуьруьн, гьакI кIелзавай аялрин гележег патал им лап кутугай пишкеш тирди къейдна.
— РФ-дин хуьруьн майишатдин министр Оксана Лутан теклифдалди Россияда ихьтин 18 агъзур мектебда агроклассар ачухиз гатIуннава, — лагьана ада. — И жергедик Агълабрин хуьруьн мектебни акатун чна пара хушдиз кьабулнава. Агрокласс ачухуни хуьруьн мулкара агротехнологиядихъ элкъуьрнавай хилер арадал гъиз, мектеб акьалтIарай аялриз хуьруьн майишатдин пешеяр хкягъиз куьмекда, юкьван ва кьилин пешекарвилин образование къачудай мумкинвилер артухарда.
Шарип Шарипов. — Дербент район хуьруьн майишатдин рекьяй аграрийрин хиляй Дагъустанда хъсанбурукай сад я. Райондин агьалийриз чилел зегьмет чIугваз кIанда. Къенин мярекат Дагъустандин руководстводи аграрный секторни образование вилик тухунин рекье кутунвай камарикай сад я лугьуз жеда. Ида, гьелбетда, хуьруьн майишатдин пешейрин кесерлувал хкажда, кадрийрин кьитвал тIимиларда. Къе хуьруьн майишатда вини дережадин технологияр гзаф ишлемишиз, еке бегьерар кIватIиз гатIуннава. И рехъ гегьеншаруниз, са рахунни алач, Дагъустанда ачухиз гатIуннавай агроклассри мадни куьмекда.
Зайдин Жамбулатов. — Къе агрономвилин пеше герек амачирди хьиз ава. Куьн Дагъустанда фад бегьердал къведай багълар кутунвай районриз килиг. А багълара кIвалахиз, вацра 3-4 агъзур доллар гуз, къецепатан уьлквейрин пешекарриз эверзава. Себеб? Чахъ гьеле ахьтин вини дережадин пешекарар тахьун я. И нукьсан арадай акъудунин мураддалди агроклассар ачухзава. Вад терефди агрокомплексдин хиле сад тир образованидин майданар арадал гъунин мураддалди санал кIвалахун патал кутIунзавай икьрарди мектебда хуьруьн майишатдин хиляй пешекарар гьазурдай чирвилер гун вилик тухуда, интегрированный планарни программаяр санал туькIуьрдай мумкинвал гуда, агрокомплексдин хилерай чирвилер гузвай проектринни ахтармишунрин кIвалахар тамамвилихъ агакьарда, аялар аграрийрин илимдихъ ва техникадихъ галаз танишарда, и темадай конкурсар, конференцияр, элкъвей столар санал тухуда, университетдин, карханадин, РД-дин хуьруьн майишатдин ва образованидин министерствойрин векилрихъ галаз гуьруьшар тешкилда. Агълабрин агромектеб Дагъустанда хъсанбурукай сад жедайдахъ зун агъунва.
Гьажимурад Мегьамедовани вичин фикирар лагьана. Гуьгъуьнлай Агълабрин хуьруьн юкьван мектебда агрокласс ачухуниз талукьарнавай икьрардал мектебдин директор Р. Агъабеговади, ДГАУ-дин ректор З. Жамбулатова, РД-дин образованидинни илимдин министрдин заместитель Гь. Мегьамедова, хуьруьн майишатдинни суьрсетдин министрдин заместитель Ш. Шарипова, «Каспий» КФХ-дин кьил М. Кьасумова къулар чIугуна.
Мярекат тешкиллудаказ кьиле фена. Мектебрин аялри багьа мугьманриз концертдин гъвечIи программа къалурна.
Къагьриман Ибрагьимов
