Са шумуд югъ идалай вилик СтIал Сулейманан райондин администрацияда боксдай Россиядин чемпионвилин тIвар къазанмишнавай Агьмедагъа Шамсудинов шад гьалара кьабулна. Райондин кьил Саид Темирханова чемпиондиз ва адан тренер Альберт Межидоваз агалкьун тебрикна.
РикIел хкин: КIварчагъай тир А. Шамсудинов 1-нумрадин ДЮСШ-дин тренер Альберт Межидован гъилик боксдал 8 йис тамам хьайидалай кьулухъ машгъул я. Гъалибвилер чи ватанэгьлиди идалай виликни са шумудра къазанмишнай. Абурукай чна газетдани муштулухар ганай.
Жегьилдиз уьлкведин чемпионвилин тIвар тебрикдайла, С. Темирханова и агалкьун, бедендинни руьгьдин лигимвал къалуруналди, Агьмедагъади аял чIавалай гьакъисагъвилелди чIугур зегьметдин ва тренердин виниз тир пешекарвилин нетижа тирди къейдна. Ада жегьилдихъ спортдин мадни кьакьан кукIушар муьтIуьгъардай къуватар хьун алхишна. Тренердиз пешедиз вафалувиляй сагърай лагьана. Районда спорт вилик тухун давамарунин, спортсменри гележегдани гъалибвилер къазанмишун патал къулайвилер тешкилунихъ умудлувал къалурна.
Нубатдин агалкьун чемпиондизни тренердиз райондин кьилин сад лагьай заместитель Заур Къагьриманова ва спортдин общественностдин векилрини тебрикна.
Рагнеда Рамалданова
