И мукьвара Махачкъалада Дагъустандин юстициядин министрдин заместитель Рабият Закавовадин ва министерстводин патав тешкилнавай общественный советдин (ОС) председатель Ислам Мегьамедован регьбервилик кваз кьиле фейи ОС-дин нубатдин заседанидал кьилин гьисабдай яз агьалийриз пулсуздаказ гун лазим тир юридический куьмек, «Госюрбюро» ГКУ-дин кIвалах веревирдна.
Заседание Ислам Мурадовича юстициядин цIийи министр Мустапа Генжеханован таржумагьалдихъ галаз танишарунилай башламишна. Сифте йикъарилай кIвалахдин яцIа, кьацIа гьатуналди, ада кьилиз акъудзавай месэлайрикай са шумуд мисал гъана.
Йикъан месэладай Дагъустандин юстициядин министерстводин законодательстводин ва нормотворческий кIвалахдин рекьяй управленидин начальник Исмаил Гьажиева ва РД-дин «Госюрбюро» ГКУ-дин директор Максуд Мегьамедова докладар авуна. ИкI, 2023-йисан эхирра тешкилнавай и бюродин макьсад агьалийрив пулсуздаказ агакьарун лазим тир юридический куьмек хъсанаруникай ва мадни менфятлуди авуникай ибарат тирди къейдна. Пулсуздаказ агакьарун лазим тир юридический куьмекдиз талукь яз, Дагъустандин законда къалурнавайвал, идаради агьалийрин 35 къатуниз къуллугъзава. Кьилди къачуртIа, абурук акатзава: III группадин инвалидар, эгер абуру кIвалахзавачтIа; ВОВ-дин ветеранрин, РФ-дин Игитрин, Советрин Союздин, Социализмдин Зегьметдин, РФ-дин Игитрин хендедаяр; женгерин гьерекатрин ветеранар ва абурун хизанар; къанун-къайда хуьдай органрин къуллугъдин, везифаяр кьилиз акъуддайла, телеф хьайи къуллугъчийрин хендедаяр; республикадин дагълух чкайра яшамиш жезвай агьалияр; уьмуьрдин четин шартIара гьатнавай ксар ва масабур. Малум хьайивал, куьмек герек яз гзафни-гзаф пенсионерар, СВО-дин иштиракчийрин хизанар къвезва. Абур гъавурдик кутазва, месэла юстициядин министерстводиз талукьди тушиз хьайитIани, гьелбетда, ахьтинбурни гьалтзава, абуруз лазим меслятар гузва.
Докладчикри гьа са вахтунда министерстводин векилар республикадин хейлин шегьерриз ва районриз физвайди, абуру агьалийрин жуьреба-жуьре суалрайни арзайрай кьил акъудзавайдини къейдна. Кьилди къачуртIа, абурук СВО-да телеф хьайибурун хендедайрив гьукуматдин патай куьмек агакьарунин, гзаф аялар авай хизанриз гузвай пулариз, коммунальный къуллугърай буржариз талукьбур ква.
Заседанидин кIвалахдин нетижаяр кьуналди, ОС-дин председатель Ислам Мегьамедова ва общественный советдин членри министерстводин, гьа гьисабдай «Госюрбюро» ГКУ-дин кIвалахдиз хъсан къимет гана. Гьакъисагъвилелди ва агалкьунралди зегьмет чIугунай ОС-дин член Гьасан Мегьамедовав Р. Закавовади ва И. Мегьамедова Дагъустандин Кьил Сергей Меликован къул алаз Чухсагъулдин чар вахкана.
Рагнеда Рамалданова
