Алатай гьафтеда Дагъустандин Кьил Сергей Меликова Афгъанистанда кьиле фейи дяведин гьерекатра иштиракай дагъустанвийрихъ галаз гуьруьш кьиле тухвана. Советрин Союздин кьушунар Афгъанистандин мулкарай ахкъудайдалай инихъ 37 йис алатнава.
«Зун афгъанви ветеранрив чIехи гьуьрметдивди эгечIзава. А вакъиайра иштиракай гзафбурукай заз муаллимар хьана, чирвилер гана. Шак алачиз, абурун меслятрал, насигьатрал за жуван уьмуьрда амални авуна.
Куьне Ватандин вилик хвавилин буржи кьегьалвилелди тамамарна, чи йикъара хайи республика, уьлкве патал яшайишдин жуьреба-жуьре хилера зегьмет чIугвазва, акьалтзавай несилриз халис ватанпересвилин чешне къалурзава. Квекай гзафбурун рухвайри, куьне меслятар гайи жегьилри алай вахтунда СВО-да къуллугъзава. Куьне гьакIни Украинада кьиле физвай серенжемда иштиракзавай аскерриз недай-хъвадай суьрсет, герек маса затIар рекье тунва. Заз къе квез куь зегьметрай, алахъунрай, кIвалахрай сагърай лугьуз кIанзава», — къейдна Сергей Меликова гьруьшдал.
Афгъанистандин вакъиайрин иштиракчийриз гьукуматди гузвай куьмекрикай республикадин ветеранрин тешкилатрин координационный советдин председатель Мегьамед Арипова хабар гана. Адан гафаралди, 2021-йисалай инихъ 503 ветерандиз яшайишдин шартIар хъсанарун патал пулдин сертификатар чара авуна. Телеф хьанвай ветеранрин хизанриз гьар вацра гузвай пулдин куьмек 2022-йисалай 10 агъзурдав агакьарнава. 2023-йисалай афгъанвияр патал улакьрин патахъай гузвай налогриз талукь кьезилвилер кардик акатнава.
Сергей Меликова гуьруьшдал афгъанвийриз 2026, 2027 ва 2028-йисара 20 агъзур манатдин кьадарда аваз са сеферда пулдин куьмек чара ийидайдакай лагьана. Советрин Союздин кьушунар Афгъанистандин мулкарай ахкъудайдалай инихъ 40 йис тамам хьун къейддайла, и кьадар 40 агъзурдав агакьардайвал я. Алай вахтунда Дагъустанда Афгъанистандин вакъиайра иштиракай 2500-далай виниз ветеранар ава.
Гуьруьшдал Сергей Меликова са кьадар ветеранрив гьукуматдин шабагьарни вахкана. Абурун арада СтIал Сулейманан райондин ветеранрин Советдин председатель Ислеман Ризаевни ава. Адаз «Дагъустан Республикадин жегьилрин лайихлу насигьатчи» лагьай гьуьрметдин тIвар ганва. Мубаракрай!
Агьмед Магьмудов
