Чи ватанэгьлияр — гьар сана
Кемеровадин областдин лап къадим шегьер тир Новокузнецкда фадлай яшамиш жезвай чи районэгьли, Уружбайрин хуьряй тир Асланов Ражидин Даштемирович 1965-йисан пуд лагьай июлдиз дидедиз хьана. 10-класс куьтягьайла, ам Махачкъаладин автодорожный колледждик экечIна. Ам акьалтIарай жегьил 1986-йисуз Новокузнецк шегьердиз рекье туна. Ина Ражидин Аслановакай шегьердин РСУ-дин пешекар хьана — сифте эцигунардайди-монтажник яз, ахпа — участокдин мастер. Гуьгъуьнлай ам карханадин са участокдин начальниквиле тайинарна.
Карханада гьуьрмет къазанмишай Р. Асланов ОАО НДРСУ-дин кьилин техникадин рекьяй заместителвиле эцигна. Ада ана пара йисар я зегьмет чIугваз. Алай вахтунда Ражидин Даштемировича ОАО НДРСУ-да, вичин везифаяр гьакъисагъдаказ тамамариз, рекьер гуьнгуьна хутазва, муькъвер ишигълу ийизва. Лагьана кIанда хьи, 68 муьгъ авай, цIивинринни металлургиядин макан тир шегьердин тарих 1622-йисалай башламиш жезва.
Ражидин Аслановаз и шегьер бегенмиш хьанва. Аквар гьаларай, ам ина кьисметди туна. Ражидин Асланов чкадин урус рушал ашукь хьана. Адан юлдашди ина бухгалтервиле, чIехи руша бубадин карханада отделдин начальниквиле кIвалахзава. ГъвечIи руш студент я. Ина ада хизандиз вичин гъилералди гуьрчег еке кIвал эцигнава, сал-багъ кутунва. Алакьдай куьмекар вичин патав атайбурузни гузва.
Ражидин Асланован зегьмет 2012- йисуз РФ-дин транспортдин министрдин патай чухсагъулдин чарчелди, 2016- йисуз губернатордин патай «За служение Кузбассу» медалдалди къейднава. Мукьвара шегьердин мэр С.Кузнецова Асланов Ражидиназ «Къизилдин лишан «Новокузнецк» ганва.
Азад вахтунда Ражидин вичин бубадин ватандиз кьил чIугваз хквезва, вичелай алакьдай куьмекарни гузва. Къуй ви рекьер гьамиша шегьре ва гуьрчегбур хьурай!
Бикеханум Алибегова
