Алатай саласадиз «Дагестанская правда» газетдин редакцияда Россиядин ФСИН-дин (Федеральная служба исполнения наказаний) Дагъустан Республикада авай Управленидин начальник, къенепатан къуллугъдин полковник Сергей Ролдугин региондин СМИ-рин векилрихъ галаз гуьруьшмиш хьана. ЦIийиз тайинарнавай регьберди гуьруьшдин макьсадни раижна: УИС-дин идарадин ва республикадин CМИ-рин векилрин арада ихтибарвал мягькемарун, кIвалахдин михьивал къалурун, агьалийрив дуьм-дуьз малуматар агакьарун патал гележегда санал кIвалахунин месэлаяр веревирд авун.
Дугъриданни, гуьруьш ачухди, итижлуди хьана. Са шумуд месэладай, кьилди къачуртIа, терроризмдиз ва экстремизмдиз, тахсиркарвилер авунвай ксариз, дустагъда авайбуруз ва анай азад хьайибур кIвалахдалди таъминаруниз талукь журналистрин суалриз мугьманди тамам жавабар гана. С. Ролдугина къейдна хьи, идарадин кIвалахдикай массовый информациядин такьатра гьакъикъатдив кьунвай, тамам малуматар гунихъ еке важиблувал ава. Гьаниз килигна, журналистрихъ галаз ачухдаказ ва лазим тир тегьерда туькIуьрнавай кIвалахди идаради кьилиз акъудзавай къуллугъдихъ жемиятдин ихтибарвал артухаруниз ва, жемятдин фикирриз яб гана, кIвалахда, герек атайла, дуьз патахъ дегишвилер твадай мумкинвал жеда.
— Ачухдаказ кIвалахун чи кьилин принциприкай сад я. Чаз жемиятдиз неинки чи «кьакьан паруярни вышкаяр», гьакI тахсиркарвал авунал, дустагъдиз аватнавай ксар дуьз рекьел хкуниз куьмекзавай чи къуллугъчийрин гьар йикъан кIвалахни акуна кIанзава. Суалар аваз хьайитIа, чун абуруз жавабар гуз гьамиша гьазур я, — къейдна ада.
С. Ролдугина къенин юкъуз УФСИН-ди Дагъустандин образованидин ва илимдин, гьакIни здравоохраненидин министерствойрихъ галаз икьраррин бинедаллаз кIвалахзавайди раижна. Кьилди къачуртIа, дустагъра авайбуру школаяр патал мебель гьазурзава, здравоохраненидин идараяр патал месин агъар цвазва. Меркездин администрациядихъ галаз икьрар кутIунунин къайгъуйрикни ква. Адан бинедаллаз зирзибил кIватIдай затIар (бакар, контейнерар) гьазурдайвал я. Лазим вири куьмекар гузвайди къейд авун яз, С. Ролдугина Гьукуматди акъуднавай къарардин бинедаллаз УФСИН-дихъ галаз икьрар кутIуниз жезвайдини раижна. Идахъ галаз сад хьиз, идарада кьилиз акъудзавай метягь вири истемишунриз жаваб гузвайди, къиметарни ужузбур тирди къейдна. Адан гафаралди, гьелелиг 60 миллион манатдилай виниз къимет авай икьрарар кутIуннава. Ам къенин юкъуз дустагъра авайбуруз чпин зегьметдалди къазанмишдай мумкинвал авайдакайни рахана. Пулдин такьатар абурувай чпин багърийриз, хизанриз рекье тваз жезва.
Сергей Ролдугина СВО-дин ветеранрин, и ва я маса себеб аваз, къуллугъ акьалтIарнавайбурун гьакъиндайни, абур кIвалахал кьабулунин къайдайрикайни лагьана. Гележегдани СМИ-дин такьатри идарадин пресс-къуллугъдин куьмекдалди датIана алакъада аваз кIвалахунихъ умудлувал къалурна.
Рагнеда Рамалданова
