15-февралдиз РАЕН-дин, Нью-Йоркдин илимрин Академиядин академик, алим Эмирбег Эмирбегован 90 йис тамам хьана. И вакъиадихъ галаз алакъалу яз ва илимдин рекье къалурнавай лайихлувилер фикирда кьуна, РАЕН-ди чи машгьур ватанэгьли, биологиядин илимрин доктор, профессор Эмирбег Зиядович Эмирбеговаз «Рыцарь науки и искусств» гьуьрметдин тIварни лишан гана.
Эмирбег Эмирбегован бинеяр Ахцегь райондин Хуьруьгрин хуьряй я. Профессорди илимдин хиле саки 65 йисуз зегьмет чIугуна. И йисара ада ДГУ-дин проректорвилин, биохимиядин кафедрадин регьбердин, биологиядин факультетдин декандин, биологиядин илимринни ахтармишунрин центрадин директордин ва маса везифаяр тамамарна.
Алимдин къелемдикай 450-далай артух илимдин макъалаяр, 4 монография хкатнава. Адан регьбервилик кваз 32 пешекарди илимрин кандидатвилин дережаяр хвена, абурукай 6 кас къецепатан уьлквейрай тир. Профессор Эмирбегова кьил кутуналди, Вирисоюздин, Вирироссиядин, международный дережадин 20-далай артух илимдин конференцияр, симпозиумар кьиле фена. Алимди вичин пешекарвал Англияда, Францияда, Египетда, Болгарияда, Италияда ва къецепатан маса уьлквейра хкажна. Алатай асирдин 70-йисара ада, санлай къачурла, 15 вацран къене США-дин алимрихъ галаз санал Рокфеллеровский университетдин нейрохимиядинни наркоманиядин институтда илимдин ахтармишунра иштиракна.
Академикдихъ илимдин рекье хьанвай агалкьунар, лайихлувилер мадни ава. Абурукай гегьеншдиз «Лезги газетдин» сайтдай кIелиз жеда.
«Лезги газетдин» редакциядин коллективди Эмирбег Зиядовичаз 90 йисан баркаллу юбилей рикIин сидкьидай мубаракзава, чаз адахъ чандин сагъвални кIубанвал хьана кIанзава.
Агьмед Магьмудов
