СтIал Сулейманан шииратдин йикъар

19-майдиз Махачкъалада, СтIал Су­лейманан тIварцIихъ галай паркуна, чIехи шаирдин сурун патав, XX асирдин Гомеран хайи — Дагъус­тандин шииратдин йикъаз­ талукьарнавай мярекат кьиле фена. РД-дин писателрин союзди тешкилнавай мярекатда шаирри, гьикаятчийри, жемиятдин ва илимдин векилри, журналистри ва масабуру иштиракна.

Анал РД-дин писателрин союздин председатель Марина Агьмедова, писателрин союздин милли секцийрин регьберар тир Максим Алимов, Супьян Омаров, Дагъустандин халкьдин шаир Фейзудин Нагъиев, милли чIаларал акъатзавай эдебиятдин журналрин кьилин редактор Мурад Агьмедов, журналист Ханжан Къурбанов, шаир Камалдин Агьмедов ва масабур рахана.

М. Агьмедовади къейд авурвал, Ра­сул Гьамзатова гайи теклифдалди­ республикада 18-майдиз Дагъус­тан­дин шииратдин югъ къейд ийиз­ цIи 73 йис тамам хьанва. И сувар инлай­ кьулухъни давам жедайди тес­ти­кьару­налди, къведай йисалай гатIун­на, ада Дагъустанда «Чешмеяр» тIвар алаз эдебиятдин цIийи фестиваль тухуз эгечIдайдакай хабар гана. Адан кьилин макьсад сифте нубатда Да­гъустандин эдебиятдин классик­рин девлетлу ирс хуьн, ам саламатдиз­ акьалтзавай несилрал агакьарун я. Фестивалдин сергьятра аваз, Дагъус­тандин халкьдин шаир СтIал Сулейманан ирсиниз иллаки кьетIен фикир гуда.

Мярекатдин сергьятра аваз, Лезги театрдин векилри — Дагъустандин халкьдин артистри — Агъахан Рамазанова, Фаризат Зейналовади, РД-дин лайихлу артистка Эльмира Къарахановади — СтIал Сулейманан шиирар кIелна, адан чIалариз кхьенвай манияр тамамарна.

СтIал Сулейманан хтул Мирзе­юсуфан гада Мусаиб Стальскийди­ вичин чIехи бубадин гьуьрметдай ши­иратдин межлис тешкилайбуруз, мяре­катда иштиракайбуруз сагърай лагьана. СтIал Сулейманан штулри — Эминадини Заринади — лезги ва урус чIаларал кIелай шиирар кIватI хьанвайбуру гурлу капар ягъуналди кьабулна.

Чи мухбир